Բժիշկները ահազանգում են․ վեյփերը երեխաներին մղում են ծխախոտի

Բրիտանացի առաջատար բժիշկները զգուշացնում են, որ էլեկտրոնային սիգարետների՝ վեյփերի տարածումը երեխաների շրջանում կարող է նպաստել հետագայում սովորական ծխախոտի օգտագործմանը։ Մասնագետները ուսումնասիրել են 81 հետազոտություն և հայտնաբերել վեյփինգի ու ծխախոտ ծխել սկսելու միջև հստակ կապ։

Մանկաբույժների խոսքով՝ վեյփ օգտագործող երեխաների մոտ ավելի հաճախ են արձանագրվում հազ, շնչառական խնդիրներ, սուլոցով շնչառություն, քնի խանգարումներ, ալերգիաներ և աչքերի հետ կապված խնդիրներ։ Մտահոգիչ են նաև նիկոտինային կախվածության և հոգեկան առողջության վրա հնարավոր ազդեցությունները։

Մասնագետները հատկապես ընդգծում են, որ վեյփը չպետք է ընկալվի որպես «մեծանալու անվնաս մաս»։ Նրանք կառավարությանը կոչ են անում ոչ միայն սահմանափակել երեխաներին գրավող գովազդն ու փաթեթավորումը, այլև նվազեցնել հասանելի համերի տեսականին։

Բրիտանիայում 11-17 տարեկանների գրեթե յուրաքանչյուր հինգերորդը գոնե մեկ անգամ փորձել է վեյփ։ Բժիշկները կարծում են, որ անհրաժեշտ են ավելի խիստ միջոցներ՝ երեխաներին նիկոտինային կախվածությունից և հետագայում ծխախոտի անցնելուց պաշտպանելու համար։