Ճապոնիան պլուտոնիումի հսկայական պաշարներ ունի միջուկային զենք ստեղծելու համար. ԶԼՄ

Ճապոնիան բավականաչափ պլուտոնիում է կուտակել մոտ 5,5 հազար միջուկային մարտագլխիկ արտադրելու համար։ Այդ մասին ՏԱՍՍ-ին հայտնել է Մոսկվայում Չինաստանի Ժողովրդական Հանրապետության դեսպան Չժան Հանհոյը։

Դիվանագետի խոսքով՝ Ճապոնիայի միջուկային ներուժը մեծ մտահոգություն է առաջացնում։ Հատկապես հաշվի առնելով, որ երկիրը միջուկից զերծ միակ պետությունն է, որն ունի օգտագործված միջուկային վառելիքի վերամշակման և զենքի համար նախատեսված պլուտոնիումի արդյունահանման տեխնոլոգիա:

Հանհոյը նշել է, որ 2024 թվականի վերջի դրությամբ Ճապոնիան կարողացել է կուտակել մոտ 44,4 տոննա պլուտոնիում։ Ճապոնիայի օգտագործված միջուկային վառելիքի պահեստարանները պարունակում են ևս 191 տոննա չլուծված պլուտոնիում: