Հնդկաստանը Google-ից պահանջել է հեռացնել հարյուրավոր հաշիվներ՝ բանկային խարդախությունների պատճառով

Հնդկաստանի իշխանությունները Google-ին հանձնարարել են փակել Firebase հարթակում գործող հարյուրավոր հաշիվներ՝ բացահայտելով խարդախությունների կազմակերպված սխեմա։ Հանցագործները հարթակն օգտագործել են խոշոր բանկերի անունից կեղծ կայքեր և հավելվածներ ստեղծելու ու օգտատերերի ֆինանսական տվյալները գողանալու համար, հայտնում է Reuters-ը։

Միայն օգոստոսին Հնդկաստանի կիբերհանցագործությունների դեմ պայքարի կենտրոնը պահանջել է հեռացնել Firebase-ում տեղակայված առնվազն 57 կայք և տվյալների բազա։ Դրանցից մի քանիսը նմանակել են երկրի խոշորագույն բանկերին՝ State Bank of India-ին, ICICI Bank-ին և Axis Bank-ին։ Կեղծ հավելվածների միջոցով հանցագործները կարողացել են ստանալ բանկային քարտերի տվյալներ, մեկանգամյա գաղտնաբառեր և այլ գաղտնի տեղեկություններ։

Reuters-ի տվյալներով՝ 2025 թվականին Հնդկաստանի քաղաքացիները կիբերխարդախությունների հետևանքով կորցրել են գրեթե 2,4 միլիարդ դոլար։ Google-ը հայտարարել է, որ իր ծառայությունների օգտագործումը ֆիշինգի, վնասաբեր ծրագրերի կամ ֆինանսական խարդախությունների համար խստիվ արգելված է, և ընկերությունը համագործակցում է Հնդկաստանի իրավապահ մարմինների հետ։