Զանգվածաբար սկսել են փակվել գեղեցկության սրահները. հայտնի է դարձել պատճառը

Ռուսաստանում 2026 թվականի առաջին յոթ ամիսներին գեղեցկության ոլորտում փակված բիզնեսների թիվը նախորդ տարվա նույն ժամանակահատվածի համեմատ աճել է մոտ 1,5 անգամ։ «Կոնտուր.Ֆոկուս»-ի տվյալներին հղում անելով՝ այս մասին գրում է «Կոմերսանտը»։

Հունվար-հուլիսին երկրում փակվել է շուրջ 12,3 հազար գեղեցկության սրահ, ինչը 52,5 տոկոսով ավելի է նախորդ տարվա ցուցանիշից։ Միաժամանակ ոլորտում նոր բիզնեսների գրանցումների թիվը նվազել է 16,1 տոկոսով՝ կազմելով մոտ 13 հազար։

Շուկայի մասնակիցները հիմնական պատճառներից մեկը համարում են հարկային բեռի ավելացումը։ Փորձագետների գնահատմամբ՝ ստեղծված պայմաններում մշտական հաճախորդներ և ուժեղ թիմ չունեցող սրահների համար գործունեությունը շարունակելը գնալով դժվարանում է, իսկ նոր բիզնես բացելը՝ ավելի ռիսկային։