Ալերգիայի սեզոնը դեռ չի ավարտվում․ որոշ բույսեր կշարունակեն ծաղկել մինչև նոյեմբեր

Ալերգիա առաջացնող խոտաբույսերի ծաղկման շրջանը Ռուսաստանում կարող է շարունակվել մինչև աշնան վերջ։ Այս մասին ՌԻԱ Նովոստիին հայտնել է Մոսկվայի պետական համալսարանի բուսաբանական այգու գիտական քարտուղար, կենսաբանական գիտությունների թեկնածու Սերգեյ Եֆիմովը։

Մասնագետի խոսքով՝ հյուսիսային և կենտրոնական շրջաններում ալերգիա առաջացնող խոտաբույսերը կարող են ծաղկել մինչև սեպտեմբերի վերջ, իսկ հարավային շրջաններում՝ մինչև նոյեմբեր։ Օգոստոսին դեռ շարունակում են ծաղկել մի շարք խոտաբույսեր, իսկ օշինդրի, եղինջի, ամբրոզիայի և թելուկի որոշ տեսակների ծաղկումը կարող է տևել մինչև սեպտեմբերի վերջ կամ հոկտեմբերի սկիզբ։ Միաժամանակ օդում ծաղկափոշու քանակն աստիճանաբար կնվազի։

Նման բույսերի նկատմամբ ալերգիան կարող է դրսևորվել մաշկի կարմրությամբ և քորով, հազով, քթահոսությամբ, արցունքահոսությամբ ու բրոնխների սպազմով։ Եֆիմովի խոսքով՝ ախտանշանները սովորաբար ուժեղանում են չոր և քամոտ եղանակին, հատկապես առավոտյան, իսկ անձրևի ժամանակ թուլանում են, քանի որ ծաղկափոշին նստում է գետնին։