200 000 դրամից պակաս ստացողների առողջության ապահովագրության համար կվճարեն նաև գործատուները

2027 թվականից 200 հազար դրամից պակաս աշխատավարձ ստացող աշխատողների առողջության ապահովագրության վճարը նախատեսվում է համատեղ հոգալ պետության, գործատուի և աշխատողի կողմից։

Առողջապահության նախարար Անահիտ Ավանեսյանի ներկայացրած նախնական նախագծով՝ աշխատողը ամսական կվճարի 2000 դրամ, պետությունը կսուբսիդավորի 4400 դրամ, իսկ ևս 4400 դրամ կվճարի գործատուն։

Նախարարության փոխանցմամբ՝ այս մեխանիզմի նպատակն է ապահովագրական համակարգում մինչև 200 հազար դրամ աշխատավարձ ստացող քաղաքացիների ներգրավումը՝ միաժամանակ սահմանափակելով նրանց ֆինանսական բեռի աճը։

Հանդիպման ընթացքում հաշվապահներն ու ընկերությունների ֆինանսական պատասխանատուները ներկայացրել են բազմաթիվ հարցեր և առաջարկներ։ Նախարարությունից նշել են, որ քննարկումները շարունակվելու են նաև առցանց ձևաչափով՝ մինչև առողջության ապահովագրության համակարգի ամբողջական ներդրումը։