ՔՊ-ն հետ է քաշվում․ իշխանությունը պատրաստվում է ապահովել «Ուժեղ Հայաստանի» երկու հանձնաժողովների նախագահների ընտրությունը․ «Ժողովուրդ»

«Ժողովուրդ» օրաթերթը գրում է. ««Ժողովուրդ» օրաթերթի իշխանական աղբյուրները փոխանցում են, որ իշխանությունը որոշել է փոխել «Ուժեղ Հայաստանի» կողմից առաջադրված ԱԺ մշտական հանձնաժողովների նախագահների ընտրության հարցում որդեգրած մարտավարությունը։

Մեր տեղեկություններով՝ «Քաղաքացիական պայմանագիր» խմբակցությունում որոշում կա անհրաժեշտության դեպքում ապահովել այնքան ձայն, որքան անհրաժեշտ է, որպեսզի «Ուժեղ Հայաստանի» կողմից առաջադրված երկու թեկնածուներ ընտրվեն, և խորհրդարանը կարողանա առաջ շարժվել օրակարգով։

Սա հատկապես ուշագրավ է այն ֆոնին, որ ընդամենը մեկ օր առաջ ՔՊ-ն կոշտ դիրքորոշում էր որդեգրել «Ուժեղ Հայաստանի» թեկնածուների նկատմամբ։ Օգոստոսի 20-ին ընդդիմադիր խմբակցության կողմից առաջադրված երեք թեկնածուները՝ Հայկ Ֆարմանյանը, Դավիթ Ղազինյանը և Արեգա Հովսեփյանը, չընտրվեցին։ Ֆարմանյանի թեկնածությանը կողմ էր 40, դեմ՝ 61 պատգամավոր, իսկ մյուս երկու թեկնածուները ևս չհավաքեցին անհրաժեշտ ձայները։

Սակայն արդեն երեկ իրավիճակը կտրուկ փոխվեց։ «Ուժեղ Հայաստանը» երկու պաշտոնների համար նոր թեկնածուներ առաջադրեց, և ֆինանսավարկային ու բյուջետային հարցերի հանձնաժողովի նախագահի պաշտոնում Լիանա Մանուկյանի թեկնածությունն ընտրվեց՝ 57 կողմ, 39 դեմ ձայնով։

Իշխանական մեր աղբյուրների փոխանցմամբ՝ սա միայն առաջին քայլն է։ ՔՊ-ում այժմ քննարկվում է ևս երկու հանձնաժողովների նախագահի ընտրության հարցը, և որոշումն այն է, որ առնվազն երկու թեկնածուների դեպքում անհրաժեշտ ձայները պետք է ապահովվեն, որպեսզի խորհրդարանը վերջապես ավարտի հանձնաժողովների ձևավորման գործընթացը։

Ու այստեղ իշխանության համար ժամանակային գործոնը պատահական չէ։

Օգոստոսի 24-ին Ազգային ժողովում պետք է մեկնարկի կառավարության ծրագրի քննարկումը։ ԱԺ փոխնախագահ Հայկ Կոնջորյանն արդեն հայտարարել է, որ երկուշաբթի խորհրդարանը կքննարկի կառավարության գործունեության ծրագիրը, իսկ դրա քննարկումն ավարտելուց հետո կվերադառնա մինչ այդ կիսատ մնացած օրակարգային հարցերին։

Այսինքն՝ իշխանությունը փաստացի կանգնած է երկու գործընթացների միջև․ մի կողմից՝ նոր կառավարության ծրագրի ներկայացումն ու խորհրդարանում դրա շուրջ քաղաքական մեծամասնության կողմից անհրաժեշտ գործընթացների ապահովումը, մյուս կողմից՝ նոր ձևավորված ԱԺ-ի մշտական հանձնաժողովների վերջնական համալրումը։

Այս համատեքստում է, ըստ մեր աղբյուրների, ՔՊ-ն որոշել «Ուժեղ Հայաստանի» հետ երկրորդ անգամ չմտնել նույն կոշտ դիմակայության մեջ։

Ավելին՝ կառավարության ծրագրի ներկայացման նախաշեմին խորհրդարանում ընդդիմադիր հանձնաժողովների ղեկավարների հարցը չլուծված թողնելը իշխանության համար կարող է քաղաքականապես ավելի խնդրահարույց դառնալ։ Եթե իշխանությունն արդեն իսկ պատրաստվում է առաջ տանել կառավարության գործունեության ծրագիրը, ապա խորհրդարանի աշխատանքը պետք է հնարավորինս ամբողջական լինի։

Մեր աղբյուրների փոխանցմամբ՝ հենց այդ պատճառով էլ ՔՊ-ում այժմ հաշվարկում են ոչ թե՝ «քվեարկե՞լ ընդդիմության թեկնածուի օգտին, թե՞ ոչ», այլ՝ քանի ձայն է անհրաժեշտ ապահովել, որպեսզի թեկնածուն անցնի։

Հաջորդ փորձությունը լինելու է առաջիկա օրերին, երբ խորհրդարանը միաժամանակ պետք է ավարտի հանձնաժողովների ձևավորումն ու անցնի կառավարության նոր ծրագրի քննարկմանը»։

Մանրամասները՝ «Ժողովուրդ» օրաթերթի այսօրվա համարում: