Արքայազն Հարին և Էլթոն Ջոնը պարտվել են դատում․ նրանցից պահանջվում է միլիոնավոր ֆունտեր վճարել

Բրիտանիայի արքայազն Հարին, երգիչ Էլթոն Ջոնը և ևս հինգ հայտնի անձինք պարտվել են Daily Mail-ի հրատարակչի դեմ գաղտնիության խախտման վերաբերյալ դատական գործով։ Ինչպես հայտնում է Reuters-ը, Լոնդոնի Բարձր դատարանը նրանց պարտավորեցրել է մինչև օգոստոսի 28-ը որպես միջանկյալ վճարում 9,54 մլն ֆունտ ստեռլինգ փոխանցել Associated Newspapers-ին՝ դատական ծախսերի դիմաց։

Դատավոր Մեթյու Նիքլինը նշել է, որ հայցվորների գործողությունները դատավարության ընթացքում «չափազանց անհիմն» են եղել, իսկ մի շարք լուրջ մեղադրանքներ հիմնված են եղել ենթադրությունների վրա։ Դատարանը դեռ հուլիսին մերժել էր այն պնդումները, թե Daily Mail-ի հրատարակիչը զանգվածաբար ապօրինի մեթոդներ է կիրառել, այդ թվում՝ հեռախոսների կոտրում։

Վճարման վերջնական չափը դեռ որոշված չէ և կարող է զգալիորեն աճել։ Associated Newspapers-ի ներկայացրած ընդհանուր դատական ծախսերը հասնում են 34,5 մլն ֆունտի, մինչդեռ հայցվորների ապահովագրությունը ծածկում է ընդամենը 16 մլն ֆունտ։ Դեռևս որոշված չէ՝ Հարին և մյուս հայցվորները կբողոքարկե՞ն վճիռը։