Պետական բյուջեի ծախսերը թերակատարվել են 317.4 մլրդ դրամով

«Լույս» հիմնադրամը վերլուծել է 2026 թվականի առաջին կիսամյակի պետական բյուջեի կատարման ցուցանիշները՝ արձանագրելով ծախսերի զգալի թերակատարում։

Հիմնադրամի տվյալներով՝ ընդհանուր ծախսերի կատարողականը ճշտված ծրագրի նկատմամբ կազմել է 83.2%․ նախատեսվածից 317.4 մլրդ դրամ պակաս է ծախսվել։ Թերակատարման զգալի մասը բաժին է ընկել ՏԿԵ, աշխատանքի և սոցիալական հարցերի, ԿԳՄՍ և պաշտպանության նախարարությունների ծրագրերին՝ համապատասխանաբար 59.5, 58.9, 56.2 և 42.2 մլրդ դրամով։

Կապիտալ ծախսերի կատարողականը կազմել է ընդամենը 56.4%, ընդ որում՝ նախորդ տարվա նույն ժամանակահատվածի համեմատ դրանք նվազել են 28.3%-ով։ «Լույս»-ը սա գնահատում է որպես բյուջետային պլանավորման և պետական ծրագրերի իրականացման արդյունավետության համակարգային խնդիրների ցուցիչ։

Միաժամանակ, եկամուտների գերակատարման և ծախսերի թերակատարման արդյունքում նախատեսված 342.4 մլրդ դրամ պակասուրդի փոխարեն առաջին կիսամյակում արձանագրվել է 67.3 մլրդ դրամ հավելուրդ։ Հիմնադրամի հաշվարկով՝ բյուջեի փաստացի կատարումը ծրագրից շեղվել է շուրջ 409.7 մլրդ դրամով։