Օձի նոր տեսակ են հայտնաբերել և այն անվանել Guns N' Roses-ի կիթառահար Սլեշի պատվին (լուսանկար)

Guns N' Roses-ի կիթառահար Սլեշը, որի իսկական անունը Սոլ Հադսոն է, գիտնականներից ստացել է անսովոր ճանաչում․ նրա անունով են կոչել Նոր Գվինեայում հայտնաբերված օձի նոր տեսակը՝ Lielaphis slashi, կամ «Սլեշի ցամաքային օձ»։

Նոր հայտնագործության մասին հոդվածը հրապարակվել է Zootaxa ամսագրում։

Երաժիշտը ողջ կյանքում հետաքրքրվել է սողուններով, աջակցել է կենդանաբանական այգիներին ու թանգարաններին և ինքն էլ օձեր է պահել։ «Որպես հերպետոլոգիայի վաղեմի սիրահար՝ ես չափազանց շոյված և շփոթված եմ, որ Lielaphis slashi-ն կոչել են իմ պատվին։ Սա իսկապես հուզիչ է։ Ես երբեք չէի մտածի, որ նման պահ կգա»,- ասել է Սլեշը։

Հետազոտության ավագ հեղինակ և Չիկագոյի Ֆիլդ թանգարանի հերպետոլոգիայի բաժնի համադրող Սառա Ռուանի համար անվան ընտրությունը հատկապես խորհրդանշական է եղել։ Ըստ նրա, ինքը մանկուց երազել է դառնալ հերպետոլոգ, իսկ 12 տարեկանում Reptiles Magazine ամսագրի շապիկին տեսել է Սլեշին իր տնային ցանցավոր պիթոնի հետ։ Ավելի ուշ նա իմացել է, որ երաժիշտը մանկուց հետաքրքրվել է օձերով, բնությամբ, թանգարաններով և կենդանաբանական այգիներով։

Նոր տեսակը կարմրաշագանակագույն օձ է՝ մոտ 71 սանտիմետր երկարությամբ։ Այն հայտնաբերվել էր դեռ 2006 թվականին՝ Նոր Գվինեայի անտառներում գիշերային արշավախմբի ժամանակ։ Այս օձերը հիմնականում ակտիվ են գիշերը և մայրամուտից հետո որս փնտրելու համար մնում են խոշոր ծառերի հիմքերի մոտ։

Սկզբում գիտնականները վստահ չէին, որ հայտնաբերել են անհայտ տեսակ։ Սակայն գենետիկական հետազոտությունները ցույց տվեցին, որ օձը էականորեն տարբերվում է մերձավոր ազգակցական տեսակներից։ Լրացուցիչ փաստարկներ դարձան մարմնի կառուցվածքի առանձնահատկությունները, մասնավորապես թեփուկների քանակը, ինչպես նաև նախընտրելի կենսամիջավայրի տարբերությունները։

Lielaphis slashi-ի վարքագծի մասին առայժմ քիչ բան է հայտնի։ Այս ցեղի օձերը բերանի հետին մասում ունեն խոշոր ատամներ, որոնց միջոցով, հավանաբար, բռնում են փոքրիկ մողեսների և այլ սողունների ձվերը։ Ի տարբերություն բոաների՝ նրանք չեն խեղդում որսին։ Ընդ որում, մարդու համար նոր օձը լուրջ վտանգ չի ներկայացնում․ այն չունի ուժեղ թույն։

Նրա համար շատ ավելի մեծ սպառնալիք է մարդու գործունեությունը։ Նոր Գվինեայի անտառները, որտեղ բնակվում է Lielaphis slashi-ն, վտանգված են սուրճի տնկարկների զարգացման և օգտակար հանածոների արդյունահանման պատճառով։

Ըստ Ռուանի, նոր տեսակների նկարագրությունը կարևոր է ոչ միայն գիտության, այլև դրանց պահպանության համար։ Անհնար է արդյունավետ պաշտպանել կենդանիներին և էկոհամակարգերը, որոնց գոյության մասին գիտնականները դեռ չգիտեն։