Ուկրաինայի պաշտոնանկ արված պաշտպանության նախարարը Զելենսկիին կոչ է արել պատասխանել նրա շրջապատում կոռուպցիայի մասին հարցերին

Ուկրաինայի նախկին պաշտպանության նախարար Միխայիլ Ֆյոդորովը բրիտանական BBC հեռուստաալիքին տված հարցազրույցում հայտարարել է, որ երկրի նախագահ Վլադիմիր Զելենսկին պետք է պատասխանի իր մերձավոր շրջապատում հնարավոր կոռուպցիայի վերաբերյալ հարցերին։

Միևնույն ժամանակ նախկին նախարարը շեշտել է, որ չի տիրապետում պետության ղեկավարի՝ կոռուպցիային անձամբ առնչվելու ապացույցների։

«Թող նա պատասխանի այդ հարցին։ Ես կարծում եմ, որ նա պատրաստ է նման հարցերի։ Դա նրա պատասխանատվությունն է՝ մեզ բոլորիս ասել՝ գիտե՞ր նա այս ամենի մասին, թե՞ ոչ։ Ես չեմ ուզում որևէ ենթադրություն անել», — ասել է Ֆյոդորովը։

Այսպես է նա մեկնաբանել ուկրաինական հակակոռուպցիոն մարմինների հետաքննությունը, որի մասին հայտարարվել էր անցյալ շաբաթ։ Քննության տվյալներով, բացահայտվել է ավելի քան 3 միլիոն դոլարի հափշտակության սխեմա, որը նախատեսվում էր օգտագործել փողերի լվացման մեջ մեղադրվող նախկին էներգետիկայի նախարարի համար գրավ վճարելու նպատակով։ Ենթադրյալ սխեմայում ներգրավված է եղել Զելենսկիի գրասենյակի բարձրաստիճան աշխատակից, որը դրանից հետո ազատվել է աշխատանքից։

Ի պատասխան՝ Ուկրաինայի նախագահի ներկայացուցիչը BBC-ին հայտարարել է, որ Ֆյոդորովը 2019 թվականից ի վեր եղել է յուրաքանչյուր կառավարության կազմում, ուստի տարօրինակ է, որ այժմ նա այս իշխանությունների մասին խոսում է այնպես, կարծես ինքը դրանց հետ կապ չի ունեցել։ Ներկայացուցիչը նշել է, որ Ֆյոդորովի պաշտոնավարման ընթացքում նման կոշտ հայտարարություններ չեն հնչել։

Ինքը՝ նախկին նախարարը, նշել է, որ Զելենսկիի հետ աշխատանքի ողջ ընթացքում երբեք նախագահից չի ստացել այնպիսի հանձնարարություններ, որոնք հակասեին օրենքին կամ ազնվության մասին իր սեփական պատկերացումներին։

«Այն ամբողջ ընթացքում, ինչ ես նրա հետ աշխատել եմ, ես երբեք նրանից չեմ ստացել առաջադրանք կամ հանձնարարություն, որոնք հակասեին օրենքին կամ իմ պարկեշտության զգացմանը։ Սա նրա հետ շփման իմ անձնական փորձն է», — հայտարարել է Ֆյոդորովը։

Ֆյոդորովը նաև կրկին հանդես է եկել Ուկրաինայում նախագահական ընտրություններ անցկացնելու օգտին։ Նա ընդունել է, որ երկիրը 2022 թվականին Ռուսաստանի լայնածավալ ներխուժման սկզբից գտնվում է ռազմական դրության պայմաններում, և այդ պայմաններում ընտրությունները կասեցված են։ Սակայն, ըստ նրա, անհրաժեշտ է քննարկել դրանց անցկացումը։

«Մենք չպետք է վախենանք այդ քննարկումից։ Հենց սա է ժողովրդավարությունը։ Եթե ես չեմ կարող ներկայացնել իմ գաղափարները և դրանց մասին բաց խոսել իմ հասարակության հետ, ապա ինչի՞ համար ենք մենք այդ դեպքում պայքարում», — ասել է նախկին նախարարը։

Նրա կարծիքով, եթե ընտրություններ ընդհանրապես չանցկացվեն, Ուկրաինան կդադարի լինել ժողովրդավարական։

Միևնույն ժամանակ Ֆյոդորովը հրաժարվել է ասել՝ հնարավոր ընտրություններում կաջակցի՞ արդյոք Զելենսկիի թեկնածությանը, և նաև ուղիղ չի հայտարարել սեփական քաղաքական հավակնությունների մասին։ Նա միայն չի բացառել, որ ապագայում կարող է առաջադրվել նախագահի պաշտոնում։

«Ամեն ինչ կախված կլինի նրանից, թե որքան շուտ մենք կկարողանանք վերականգնել ժողովրդավարական ընտրական գործընթացը, որքան էներգիա ես կունենամ, կպահպանե՞մ արդյոք իմ թիմը և կկարողանա՞մ ինքս ինձ պատասխանել այն հարցին, թե արդյոք կհաղթահարեմ նախագահի պաշտոնը», — ասել է նա։

Ֆյոդորովի կարծիքով, ի վերջո ամենակարևորը հենց ուկրաինացիների որոշումն է լինելու. «Կարո՞ղ են մարդիկ ինձ ասել՝ այո՛, մենք ձեզ վստահում ենք այս պաշտոնը»։

35-ամյա Ֆյոդորովը անցյալ ամիս ազատվել էր պաշտպանության նախարարի պաշտոնից։ Ավելի վաղ նա ղեկավարել էր Թվային փոխակերպման նախարարությունը և հայտնի էր դարձել ուկրաինական զինված ուժերում ժամանակակից տեխնոլոգիաների ներդրման շնորհիվ, այդ թվում՝ «դրոնների բանակ» հայեցակարգի զարգացման միջոցով։

Նախկին նախարարը հայտարարել է, որ կշարունակի զբաղվել ռազմական տեխնոլոգիաներով և առաջիկա շաբաթներին նախատեսում է այցելել ԱՄՆ, որտեղ հույս ունի հանդիպել Իլոն Մասկի հետ։ Նա հայտնել է, որ ցանկանում է քննարկել Starlink արբանյակային համակարգի հետագա օգտագործումը, որը կարևոր դեր է խաղում ուկրաինական զինվորականներին կապով ապահովելու գործում։

Ֆյոդորովը նաև քննադատել է արևմտյան բյուրոկրատիան, որն, ըստ նրա, ձգձգում է Ուկրաինային սպառազինությունների մատակարարումը։ Նա դաշնակիցներին կոչ է արել ավելի ակտիվորեն ֆինանսավորել ժամանակակից ուկրաինական անօդաչու սարքերի արտադրությունը՝ հնացող տեխնիկա փոխանցելու փոխարեն։

«Մեզ պետք չէ տանկերի վերանորոգում, երբ մենք այլևս տանկեր չենք օգտագործում», — հայտարարել է նա։

Նախկին նախարարի կարծիքով, ժամանակակից տեխնոլոգիաների և սպառազինության ավելի արագ փոխանցումը թույլ կտար ոչ միայն բարձրացնել ուկրաինական բանակի արդյունավետությունը, այլև փրկել ուկրաինացի զինծառայողների կյանքերը։