Ամռան սկզբից Ֆրանսիայում անոմալ շոգի պատճառով 301 մարդ է ջրահեղձ եղել

Հունիսի 19-ից Ֆրանսիայում գրանցվել է ջրահեղձման հետևանքով մարդկանց մահվան 301 դեպք, ինչը 14%-ով ավելի է, քան անցյալ տարվա նույն ժամանակահատվածում։ Սպորտի և երիտասարդության հարցերով նախարար Մարինա Ֆերարին ողբերգությունների թվի աճը կապել է երկարատև շոգի ալիքների հետ, հայտնում է BBC News-ը։

Ըստ նրա, շատ մարդիկ, փորձելով փրկվել բարձր ջերմաստիճանից, մտնում են ջուրը՝ վտանգը հաշվի չառնելով։ Մասնավորապես, մահացու դեպքեր տեղի են ունեցել լողի համար չնախատեսված և չկահավորված վայրերում, ինչպես նաև բաց ջրամբարներում՝ օրինակ գետերում և ջրանցքներում։

Ֆերարին նշել է, որ շոգին երկար մնալուց հետո հանկարծակի սառը ջրի մեջ ընկղմվելը կարող է շոկ առաջացնել։ Բացի այդ, մարդիկ կարող են գերագնահատել իրենց ֆիզիկական հնարավորությունները։ Զոհվածների զգալի մասը, հատկապես տարեցների շրջանում, խեղդվել է մասնավոր լողավազաններում։

Ֆրանսիայի իշխանությունները տարածաշրջանային վարչակազմերի հետ համատեղ մտադիր են բարձրացնել լողի վայրերի անվտանգությունը։

Այս ամառ Ֆրանսիան, Իսպանիան և Իտալիան բախվել են երկարատև շոգի ալիքների, որոնք ուղեկցվել են խոշոր անտառային հրդեհներով։ Եվրոպական Copernicus կլիմայական ծառայության տվյալներով, Եվրոպան տաքանում է մոտավորապես երկու անգամ ավելի արագ, քան համաշխարհային միջին ցուցանիշն է։

Ֆրանսիայում նաև մայիսի վերջից մինչև հուլիսի 22-ը գրանցվել է մոտ 7300 լրացուցիչ մահ, որոնք նախնական տվյալներով կապված են եղել շոգի հետ։