ԵՄ-ն Իսրայելին կոչ է արել չեղարկել Հորդանան գետի ափին բնակելի միավորների կառուցման մրցույթը

ԵՄ-ի հայտարարության համաձայն՝ E1 նախագծի իրականացումը կարող է բաժանել Հորդանան գետի Արևմտյան ափը երկու մասի՝ մեկուսացնելով Արևելյան Երուսաղեմը և էլ ավելի խաթարելով երկու պետությունների ստեղծման լուծման հեռանկարները։ 

Եվրամիությունը պնդում է, որ Արևմտյան ափին իսրայելական բնակավայրերի կառուցումն, այդ թվում՝ E1 հատվածում, հակասում է միջազգային իրավունքին։ ԵՄ-ն Իսրայելի կառավարությանը կոչ է արել չեղարկել մրցույթը, դադարեցնել E1 նախագծի և բնակավայրերի ընդլայնման մյուս ծրագրերը, ինչպես նաև ապահովել վերաբնակիչների կողմից իրականացվող բռնությունների համար պատասխանատվության ենթարկումը։ 

Իսրայելի իշխանությունները օգոստոսի 18-ին E1 տարածքում 1234 բնակելի միավորների կառուցման մրցույթ էին հայտարարել։ Քննադատները մտահոգություն են հայտնում, որ նախագիծը կարող է խոչընդոտել պաղեստինյան տարածքների տարածքային շարունակականությանը և երկու պետությունների լուծման հնարավորությանը։