Եվրամիությունը Ուկրաինային հերթական խոստումներն է տվել

Եվրամիությունը Ուկրաինայի Անկախության օրվա կապակցությամբ խոստացել է շարունակել աջակցությունը Կիևին՝ առանց ժամկետային սահմանափակման։ Եվրոպական խորհրդի նախագահ Անտոնիու Կոշտան հայտարարել է, որ Բրյուսելը կշարունակի աջակցել Ուկրաինային «այնքան ժամանակ և այնպիսի ծավալով, որքան անհրաժեշտ կլինի», հայտնում է FAZ-ը։

Կոշտայի խոսքով՝ պատերազմի չորսուկես տարիների ընթացքում ԵՄ-ն Ուկրաինային աջակցելու համար արդեն մոբիլիզացրել է ավելի քան 220 միլիարդ եվրո։ Նա նաև վերահաստատել է Ուկրաինայի եվրոպական հեռանկարը՝ ԵՄ անդամակցությունն անվանելով երկրի անվտանգության և երկարաժամկետ ժողովրդավարական կայունության լավագույն երաշխիքը։

Եվրոպական խորհրդի նախագահը հայտնել է նաև դեկտեմբերին համաձայնեցված 90 միլիարդ եվրոյի վարկի տրամադրման մասին։ Գումարը նախատեսվում է ուղղել ձմռանը նախապատրաստվելուն, անօդաչու թռչող սարքերի ձեռքբերմանը և հակաօդային պաշտպանության ուժեղացմանը։ Կոշտան նաև հայտարարել է Ռուսաստանի նկատմամբ ճնշումը մեծացնելու և նոր պատժամիջոցներ սահմանելու պատրաստակամության մասին։