Թրամփի՝ Կիմ Չեն Ընի հետ մերձեցման փորձը խորացրել է Ասիայում ԱՄՆ-ի հուսալիության վերաբերյալ կասկածները

ԱՄՆ նախագահ Դոնալդ Թրամփի՝ Հյուսիսային Կորեայի առաջնորդ Կիմ Չեն Ընի հետ հարաբերությունները բարելավելու փորձերը մտահոգություն են առաջացրել Վաշինգտոնի ասիական գործընկերների շրջանում։ Ինչպես գրում է Reuters-ը, Ճապոնիայից մինչև Հնդկաստան ԱՄՆ-ի գործընկերները վերագնահատում են, թե անվտանգության հարցերում որքանով կարող են ապավինել Վաշինգտոնին։

Մտահոգությունն ուժեղացել է այն բանից հետո, երբ Թրամփը որոշել է կրճատել Հարավային Կորեայի հետ համատեղ զորավարժությունները՝ դրանք Փհենյանի նկատմամբ թշնամական անվանելով։ ԱՄՆ-ը նաև չեղարկել է հաջորդ ամիս նախատեսված ևս մեկ զորավարժություն Հարավային Կորեայի հետ՝ պատճառաբանելով Իրանի հետ պատերազմի հետևանքով ամերիկյան ուժերի ծանրաբեռնվածությունը։ Փորձագետների գնահատմամբ՝ նման քայլերը կարող են կասկածներ առաջացնել տարածաշրջանում ԱՄՆ-ի անվտանգության պարտավորությունների վերաբերյալ։

Հատկապես մտահոգված են Ճապոնիայում և Թայվանում։ Տոկիոն մտավախություն ունի, որ Վաշինգտոնը կարող է կտրուկ մեծացնել Ճապոնիայում ամերիկյան զորքերի տեղակայման համար պահանջվող ֆինանսական ներդրումները, իսկ Թայվանը հետևում է Թրամփի և Չինաստանի նախագահ Սի Ծինփինի առաջիկա հանդիպման նախապատրաստմանը։ Reuters-ի տվյալներով՝ Թրամփը նաև առայժմ հետաձգել է Թայվանին 14 միլիարդ դոլարի սպառազինության վաճառքի փաթեթի հաստատումը՝ Պեկինի հետ հարաբերությունները չսրելու նպատակով։ Հնդկաստանում ևս ավելի զգուշավոր են դարձել Վաշինգտոնի հետ երկարաժամկետ պաշտպանական համաձայնագրերի հարցում։