Նոր մանրամասներ՝ ՀՀ ԶՈՒ-ում տեղի ունեցած հերթական ինքնասպանության դեպքի մասին

Վերջին շաբաթվա ընթացքում արդեն 3-րդ ողբերգական դեպքն է արձանագրվում ՀՀ ԶՈՒ-ում։ «Հրապարակ»-ի տեղեկություններով այսօր՝ օգոստոսի 24-ին, Սիսիանի զորամասերից մեկում հերթական ողբերգական դեպքն է արձանագրվել։ Ըստ թերթի տեղեկությունների՝ զորամասում հայտնաբերվել է պայմանագրային զինծառայողի դի։

Նախնական վարկածով՝ զինծառայողը ինքնասպանություն է գործել։ Դեպքի հանգամանքները, սակայն, դեռևս հայտնի չեն։ Պաշտոնական տեղեկություններ ևս չկան, սակայն Քննչական կոմիտեի  «Հրապարակ»-ի աղբյուրը հաստատել է զինծառայողի մահվան լուրը: Նրա դին հայտնաբերվել է զորամասի դիմաց։

Euromedia24TV-ի աղբյուրի փոխանցմամբ դեպքը տեղի է ունեցել Սիսիսանի Դոսաաֆի զորամասում։ Զոհված զինծառայողը 37-ամյա սպայական կազմի ծառայող՝ ավագ լեյտենանտ է եղել։ Մեր աղբյուրը պատմեց, որ ինքնասպան եղած զինծառայողը քույր ու եղբայր է ունեցել, որոնք էլ ծառայում են Սիսիսանի Նորավանի զորամասում։ 

«Հրապարակ»-ի տեղեկություններով էլ՝ զինծառայողը վերջերս փորձել է մասնակցել ատեստավորման, սակայն ատեստավորման հետ կապված որոշակի խնդիրներ է ունեցել։ Մեր աղբյուրի փոխանցմամբ` չի բացառվում,որ այդ հանգամանքը նրան բավականին անհանգստացրել է և հոգեբանական ծանր վիճակի մեջ է գցել, քանի որ ֆինանսական որոշ խնդիրներ է ունեցել։