ՆԱՏՕ-ի երկրները չեն կարողանա «անպատիժ» մնալ Կիևին ռազմական օգնություն ցուցաբերելիս․ Լավրով

ՆԱՏՕ-ի երկրները փորձում են նախապես ազատվել Ուկրաինային ռազմական օգնության պատասխանատվությունից, սակայն դա չի ստացվի։ Ըստ ՌԻԱ Նովոստիի՝ այս մասին ասել է Ռուսաստանի արտաքին գործերի նախարար Սերգեյ Լավրովը «Ռոսիա» հեռուստաընկերության լրագրող Պավել Զարուբինին։

«Նրանք գիտեն, թե ինչ են անում, և փորձում են, ինչպես ասում են, հրապարակայնորեն նախապես ազատվել դրանից։ Դա չի ստացվի», - ասել է նա։

Լավրովը նաև բարձրացրել է Հյուսիսատլանտյան դաշինքի 5-րդ հոդվածը կիրառելու հարցը, որը սահմանում է կոլեկտիվ պաշտպանության սկզբունքը։ Նրա խոսքով՝ Մոսկվան կասկածի տակ է դնում, թե արդյոք ՆԱՏՕ-ի երկրները «իրավունք ունեն կոլեկտիվ հարձակում իրականացնել կոլեկտիվ պաշտպանության փոխարեն»։

Լավրովը հավելել է, որ Ռուսաստանը հաշվի կառնի ՆԱՏՕ-ի և Եվրամիության երկրներում, այդ թվում՝ Մեծ Բրիտանիայում, Ֆրանսիայում, Գերմանիայում և ԵՄ ղեկավարության «ռուսաֆոբ էլիտաների» գործողությունները։