Սիսիանի համայնքապետը ծնողների ընկերության հետ շուրջ 86 մլն դրամի պայմանագրեր է կնքել. Հետք

Սիսիանի համայնքապետ Հովսեփ Առաքելյանի՝ համայնքի ղեկավար դառնալուց հետո նրա ծնողներին՝ Հրաչ Առաքելյանին և Էլադա Իվանյանին պատկանող «Առաքել» ՍՊԸ-ն Սիսիանի համայնքապետարանի հետ կնքել է երեք պայմանագիր՝ ընդհանուր շուրջ 85.8 մլն դրամի չափով․ այս մասին գրում է «Հետքը»։

Ըստ հրապարակման՝ պայմանագրերից մեկը՝ 56.9 մլն դրամի, կնքվել է Որոտան կինոթատրոնի դիմացի հատվածի բարեկարգման համար, մյուսը՝ 25.2 մլն դրամի, Սիսիան քաղաքում կրթական այգու կառուցման նպատակով։ Մինչ այդ՝ 2024 թվականի ապրիլին, երբ Հովսեփ Առաքելյանը համայնքի ավագանու անդամ էր, նույն ընկերությունը հաղթել էր Շենաթաղ բնակավայրում շենքի տանիքի վերանորոգման մրցույթում և կնքել 3.7 մլն դրամի պայմանագիր։

Առաքելյանը հայտնել է, որ ծնողներին պատկանող ընկերության հաղթանակները մրցույթներում պայմանավորված չեն իր պաշտոնով։ Նա նշել է, որ շահերի հնարավոր բախման վերաբերյալ հայտարարություն է ներկայացրել Կոռուպցիայի կանխարգելման հանձնաժողով և տեղեկացրել ընկերության հետ իր ազգակցական կապի մասին։ Նշվում է նաև, որ գործող օրենսդրությամբ համայնքի ղեկավարին փոխկապակցված անձանց հետ նման պայմանագրեր կնքելն արգելված չէ, սակայն 2026 թվականի մայիսի 6-ի փոփոխություններով դա 2027 թվականի հունվարի 1-ից արգելվելու է։