Ղազախստանը համաձայնել է Ռուսաստանին բենզինով և դիզելային վառելիքով օգնել

Ղազախստանի «Կոնդենսատ» նավթավերամշակման գործարանը Ռուսաստանին կմատակարարի արտադրվող բենզինի և դիզելային վառելիքի շուրջ 70 տոկոսը։ Այս մասին հայտնել է Ղազախստանի էներգետիկայի նախարար Երլան Ակկենժենովը, փոխանցում է «Ինտերֆաքս»-ը։

Նախարարի խոսքով՝ որոշումն ընդունվել է Ռուսաստանի էներգետիկայի նախարարության պաշտոնական դիմումից հետո։ Գործարանում վերամշակվելու է ռուսական նավթ, իսկ ստացված վառելիքի 70 տոկոսը կուղարկվի Ռուսաստան։ Մնացած 30 տոկոսը կմնա Ղազախստանում։ «Կոնդենսատ» գործարանի տարեկան հզորությունը կազմում է շուրջ 850 հազար տոննա։

Ռուսաստանում վերջին շրջանում բենզինի մատակարարման հետ կապված խնդիրներ են առաջացել մի շարք նավթավերամշակման գործարաններում չնախատեսված վերանորոգումների ֆոնին, որոնց մի մասը տուժել է անօդաչու թռչող սարքերի հարվածներից։ Ռուսաստանի նախագահ Վլադիմիր Պուտինն ավելի վաղ ընդունել էր, որ վառելիքի ոլորտում բնակչության համար «որոշակի անհարմարություններ» կան՝ նշելով, որ կառավարությունը զբաղվում է խնդրով։