Փաշինյանը պատրաստ է բանակցել կաթողիկոսի հետ

Վարչապետ Նիկոլ Փաշինյանը հայտարարել է, որ պատրաստ է Ամենայն հայոց կաթողիկոս Գարեգին Երկրորդի հետ նստել բանակցությունների սեղանի շուրջ, եթե կաթողիկոսն ընդունի, որ Հայ առաքելական եկեղեցում առկա են խնդիրներ և անհրաժեշտ է բարենորոգում։

Փաշինյանի խոսքով՝ կառավարության կողմից Հայաստանյայց առաքելական սուրբ եկեղեցում ստեղծված իրավիճակի վերաբերյալ զեկույցը պատրաստ կլինի առավելագույնը մեկ ամսվա ընթացքում։ Դրանից հետո այն կներկայացվի Ազգային ժողովին։ Վարչապետը նաև առաջարկելու է խորհրդարանում ստեղծել քննիչ հանձնաժողով՝ եկեղեցուն վերաբերող հարցերը և առկա խնդիրները մանրամասն ուսումնասիրելու նպատակով։

«Եթե Գարեգին Բ-ն ընդունի այդ օրակարգը, ես այս ամբիոնից հանդիսավոր կերպով ասում եմ՝ կնստեմ իր հետ, ամենայն հարգանքով կքննարկեմ այդ օրակարգը»,- ասել է Փաշինյանը։

Նա նշել է, որ եկեղեցու բարենորոգման օրակարգը, իր ձևակերպմամբ, ներառում է բարեվարքության կանոնների սահմանում և դրանց պահպանման հստակ մեխանիզմների ներդրում։ Վարչապետի խոսքով՝ այդ կանոնները պետք է գործեն բոլորի համար՝ անկախ նրանից, թե տվյալ հոգևորականը որ խմբին է պատկանում կամ ինչ դիրքորոշում ունի։

Միաժամանակ նա հերթական անգամ քննադատել է եկեղեցու ղեկավարությանը՝ Գարեգին Երկրորդին, մասնավորապես, մեղադրելով «պատերազմի կուսակցության ներկայացուցիչ» լինելու մեջ։