Բրազիլիան TikTok-ի սեփականատիրոջը տուգանել է մոտ 30 միլիոն դոլարով. Պատճառը հայտնի է

Բրազիլիայի անձնական տվյալների պաշտպանության կարգավորող մարմինը երեքշաբթի օրը ավելի քան 153 միլիոն ռեալով (մոտ 30 միլիոն դոլար) տուգանել է TikTok-ի մայր ընկերությանը՝ ByteDance-ին՝ երեխաների և դեռահասների անձնական տվյալների մշակման ընթացքում թույլ տրված ենթադրյալ խախտումների համար, հայտնում է Associated Press-ը։

Գերատեսչությունը հայտարարել է, որ TikTok-ը խախտել է տվյալների պաշտպանության մասին օրենսդրությունը՝ ինչպես գրանցված, այնպես էլ հարթակն առանց գրանցման դիտող օգտատերերի նկատմամբ։ Կարգավորողի տվյալներով՝ ընկերությունն առանց պատշաճ իրավական հիմքերի և անհրաժեշտ պաշտպանական միջոցառումների հավաքագրել և մշակել է անչափահասների անձնական տեղեկատվությունը։

Կարգավորող մարմինը նաև պարտավորեցրել է TikTok-ին հեռացնել բոլոր այն տվյալները, որոնք, իր գնահատմամբ, ստացվել են ապօրինի ճանապարհով, և ներկայացնել հարթակում անչափահասների պաշտպանությունն ուժեղացնելու ծրագիր։

ByteDance-ն 10 օր ունի որոշումը բողոքարկելու համար։ Ընկերությունն առայժմ չի մեկնաբանել սահմանված տուգանքը։

Սա Բրազիլիայի հերթական քայլն է սոցիալական ցանցերի դեմ։ Ոչ վաղ անցյալում՝ օգոստոսին, նույն կարգավորիչ մարմինը հանձնարարել էր կասեցնել Discord հարթակի ուղիղ հեռարձակումները։ Որոշումը կայացվել է ուղիղ եթերները ինքնասպանության դեպքերից մեկի հետ կապելուց հետո։

Բրազիլիայի իշխանությունները՝ նախագահ Լուիս Ինասիու Լուլա դա Սիլվայի գլխավորությամբ, ինչպես նաև երկրի Գերագույն դատարանը փորձում են խստացնել անչափահասների կողմից ինտերնետի օգտագործման կարգավորումները։ Անալոգային միջոցներ են ձեռնարկում նաև Ավստրալիան, Կանադան և Ինդոնեզիան։

Բրազիլիայի առաջին տիկին Ռոզանջելա Լուլա դա Սիլվան, ով հայտնի է որպես Ժանժա, օգոստոսի 6-ին կոչ էր արել փակել TikTok-ը հիշատակված դեպքից հետո։ Նա նաև բազմիցս քննադատել է հարթակը՝ երեխաների և դեռահասների ոչ բավարար պաշտպանվածության համար։