Իրանը չի հաստատել Հորմուզի նեղուցի անհապաղ բացումը

Իրանի ԱԳ փոխնախարար Քազեմ Ղարիբաբադին, «Mehr»-ի փոխանցմամբ, պարզաբանել է Օմանի հետ Հորմուզի նեղուցի վերաբերյալ ձեռք բերված պայմանավորվածությունների մանրամասները՝ ընդգծելով, որ դրանք չեն նշանակում նեղուցի անհապաղ բացում։

Նրա խոսքով՝ վերջին 58 տարիներին նավերը անցել են Օմանի տարածքային ջրերով, ինչի հետևանքով Իրանը զգալի վնասներ է կրել։ Այժմ Հորմուզի նեղուցի հարցը Իրանի համար ազգային անվտանգության խնդիր է, և նավերի մուտքի ու ելքի երթուղիները պետք է էականորեն փոխվեն։

Պայմանավորվածության համաձայն՝ Պարսից ծոց մուտքի երթուղին անցնելու է Իրանի ջրերով, իսկ ելքի երթուղին՝ Օմանի տարածքային ջրերով։ Միաժամանակ երկու երթուղիներում էլ նավերը հատելու են Իրանի ջրերը։

Նշվում է, որ այս երթուղին ժամանակավոր է։ Իրանը և Օմանը 30–60 օրվա ընթացքում պետք է բանակցություններ անցկացնեն մշտական նոր երթուղի ստեղծելու շուրջ, որը կփոխարինի նախկին ծովային երթևեկության սխեմային։