Ամերիկյան ընկերությունը հրաժարվել է հայկական ավիաընկերությանը տրամադրել նախատեսված ինքնաթիռը՝ Ռուսաստանի հետ Հայաստանի դաշնակցային կապերի պատճառով

Ամերիկյան ընկերությունը հայկական ավիաընկերությանը չի տրամադրել նախատեսված ինքնաթիռը՝ Ռուսաստանի հետ Հայաստանի կապերի պատճառով:

Հայկական «Hayways» ավիաընկերությունը դատի է տվել ինքնաթիռի սեփականատիրոջը։ Ընկերությունը 2021 թվականին լիզինգով պետք է ստանար Boeing 737-800, որը տեխնիկական սպասարկման նպատակով տեղափոխվել էր Հորդանան և նույնիսկ ներկվել «Hayways»-ի գույներով։

Սակայն ռուս-ուկրաինական պատերազմի սկսվելուց հետո ինքնաթիռի սեփականատերը չեղարկել է գործարքը՝ պատճառաբանելով, որ Հայաստանը Ռուսաստանի դաշնակիցն է, և մտավախություն կա, թե ինքնաթիռը կարող է չվերադարձվել կամ առգրավվել։

«Hayways»-ը պնդել է, որ ինքնաթիռը չի շահագործվելու դեպի Ռուսաստան ուղղությամբ, սակայն դա չի փոխել սեփականատիրոջ որոշումը։ 2022 թվականի մայիսին ինքնաթիռը Հորդանանից տեղափոխվել է Սլովակիա և մինչ օրս շահագործվում է այնտեղ։

Լոնդոնի միջազգային արբիտրաժային դատարանում «Hayways»-ի նախորդ հայցը մերժվել է։ Այժմ ընկերությունը դիմել է ԱՄՆ դատարան՝ պահանջելով ավելի քան 750 հազար դոլարի փոխհատուցում՝ չհաշված տոկոսները, դատական և փաստաբանական ծախսերը։