Մենք որևէ բան չենք արել ՌԴ-ի հետ հարաբերությունները վատթարացնելու համար. Ռուբինյան

ԱԺ նախագահ Ռուբեն Ռուբինյանը հայտարարել է, որ Հայաստանը չի ձգտում վատթարացնել Ռուսաստանի հետ հարաբերությունները և հակառակը՝ շարունակում է քայլեր ձեռնարկել բարիդրացիական ու բարեկամական հարաբերություններ պահպանելու ուղղությամբ։ Նրա հայտարարությունը հնչել է՝ անդրադառնալով ՌԴ Պետդումայի նախագահ Վյաչեսլավ Վոլոդինի՝ Հայաստանի հասցեին հնչեցրած քննադատությանը։

«Մենք միշտ ենք անկեղծ եղել, մենք չէ, որ որևէ բան ենք արել Ռուսաստանի հետ հարաբերությունները վատթարացնելու համար, հակառակը, մենք ամեն ինչ արել ենք ու շարունակելու ենք անել Ռուսաստանի հետ նորմալ, բարիդրացիական, բարեկամական հարաբերություններ ունենալու համար»,- ասել է Ռուբինյանը։

ԱԺ նախագահը միաժամանակ անդրադարձել է հայ տնտեսվարողների նկատմամբ Ռուսաստանի կողմից կիրառվող սահմանափակումներին։ Նրա խոսքով՝ այդ սահմանափակումներն անարդարացի և անտեղի են ու չեն համապատասխանում Հայաստան-Ռուսաստան հարաբերությունների ոգուն, ինչպես նաև ԵԱՏՄ կանոններին։