Երևանի 103 շտապօգնության բժիշկը գլխիվայր շրջված մեքենայից փրկել է երեխայի կյանքը

Երևանի Դավթաշեն վարչական շրջանում օրեր առաջ տեղի ունեցած խոշոր ավտովթարի ժամանակ Երևանի 103 շտապօգնության բժիշկ Արամ Աբրահամյանը, վտանգելով սեփական կյանքը, գլխիվայր շրջված ավտոմեքենայից դուրս է բերել երեխային և հասցրել շտապօգնության մեքենայի մոտ։

Օգոստոսի 24-ին՝ ժամը 01։10-ի սահմաններում, Եղվարդի խճուղում բախվել էին «Nissan» և «Ford Transit» մակնիշի ավտոմեքենաները։ Բախման հետևանքով «Nissan»-ը գլխիվայր շրջվել էր։ Վթարի վայր ժամանած շտապօգնության 21-րդ խումբը վիրավորներին օգնություն է ցուցաբերել, իսկ վարորդներից մեկին տեղափոխել հիվանդանոց։

SHAMSHYAN.com-ի փոխանցմամբ՝ Արամ Աբրահամյանը մտել է շրջված մեքենայի մեջ և այնտեղից դուրս բերել երեխային՝ գրկած հասցնելով շտապօգնության ավտոմեքենայի մոտ, որտեղ գործընկերների հետ անմիջապես բուժօգնություն են ցուցաբերել նրան։ Բժշկի գործողությունները հատկապես վտանգավոր են եղել՝ հաշվի առնելով նման վթարներից հետո հնարավոր գազի արտահոսքի կամ հրդեհի վտանգը։

Դեպքից հետո բժիշկ Արամ Աբրահամյանի գործողությունները լայն արձագանք են ստացել։ Նրա արագ կողմնորոշումն ու մասնագիտական պարտքը կատարելու պատրաստակամությունը թույլ են տվել երեխային ժամանակին դուրս բերել վտանգավոր իրավիճակից։ Դեպքի առթիվ նախաձեռնվել է քրեական վարույթ, իսկ վթարի հանգամանքները պարզվում են։