Բժիշկները տղամարդու միզապարկից հեռացրել են ռեկորդային մեծ չափի քար

Շրի Լանկայում բժիշկները 55-ամյա տղամարդու միզապարկից հեռացրել են 3.1 կգ քաշով քար, որը, հնարավոր է, վիրահատականորեն հեռացված ամենամեծ քարն է։ Այս մասին BBC-ին տված հարցազրույցում հայտարարել է Տրինկոմալիի պետական ​​հիվանդանոցի աշխատակից, վիրաբույժ Պրահալախան Բալակրիշնանը։

Տղամարդը հիվանդանոց է ընդունվել կաթվածից հետո։ Բուժման ընթացքում բժիշկները հայտնաբերել են միզուղիների հետ կապված խնդիրներ և ախտորոշել են միզապարկի քարեր։ Վիրահատության ընթացքում մասնագետները հեռացրել են քարը, որը մոտավորապես 17 սմ երկարություն ուներ և կշռում էր 3.1 կգ՝ մոտավորապես լիարժեք ծնված երեխայի քաշը։

«Քարը կարող էր տղամարդու մարմնում լինել հինգից տասը տարի։ Դրանք սովորաբար առաջանում են, երբ խտացված մեզի հանքանյութերը բյուրեղանում են և աստիճանաբար ձևավորում կարծր զանգված։ Պատճառներից մեկը միզապարկի ոչ լիարժեք դատարկումն է», - նշել են բժիշկները։

Հեռացված քարը, ենթադրաբար, կգերազանցի ներկայիս ռեկորդը։ Գինեսի ռեկորդների գրքի համաձայն՝ նախկինում հեռացված ամենամեծ միզապարկի քարը կշռում էր 1.9 կգ և հեռացվել էր Բրազիլիայում գտնվող մի հիվանդի մոտ 2003 թվականին։ Դրա երկարությունը 17.9 սմ էր։ Նոր ռեկորդի վերջնական կարգավիճակը պետք է առանձին հաստատվի։

Տղամարդն այժմ մնում է հիվանդանոցում և շարունակում է կաթվածի բուժումը։ Բժիշկները նշում են, որ վիրահատությունից հետո նրա առողջական վիճակը լավ է մնում։

Թարգմանությունը՝ Lurer,com-ի