Տանզանիայի փոխնախագահը հրաժարական է տվել

Տանզանիայի փոխնախագահ Էմանուել Նչիմբին հայտարարել է իր հրաժարականի մասին։ Այն ուժի մեջ կմտնի սեպտեմբերի 4-ին՝ պաշտոնը ստանձնելուց ավելի քան կես տարի անց, հաղորդում է Associated Press-ը։

Վերլուծաբանների կարծիքով՝ նրա հեռացումը կարող է կապված լինել երկրի նախագահ Սամիա Սուլուհու Հասանի հետ ունեցած տարաձայնությունների հետ։

Նչիմբիի հայտարարության մեջ ասվում է, որ նա «լիովին համոզված է» այլ տեղակալ ունենալու Հասանի ցանկության մեջ: Նախագահի աշխատակազմը հաստատել է, որ Սահմանադրությանը համապատասխան ձևով կսկսվի նոր փոխնախագահի նշանակման ընթացակարգը։

Նչիմբիի հրաժարականը անակնկալ է եղել Աֆրիկայի քաղաքականապես ամենակայուն երկրներից մեկի՝ Տանզանիայի համար: 1961 թվականին Մեծ Բրիտանիայից անկախություն ձեռք բերելուց ի վեր երկիրը փաստացի ղեկավարում է «Չամա չա Մապինդուզի» կուսակցությունը։

Իրավապաշտպան և անկախ վերլուծաբան Տիտո Մագոտիի խոսքով՝ Նչիմբիի և Հասանի հարաբերություններն այդքան էլ լավ չեն եղել։ Վերլուծաբանները նրանց տարաձայնությունները կապում են նաև հոկտեմբերի 29-ի ընտրություններից հետո իշխանությունների վարած քաղաքականության և դրան հաջորդած բողոքի ցույցերի ճնշման հետ:

Ընտրություններից հետո հրապարակված հետաքննության համաձայն՝ բռնությունների հետևանքով զոհվել է 518 մարդ։ Խոշոր քաղաքներում անկարգությունները ցրելիս իշխանությունները ոստիկանության հետ մեկտեղ ներգրավել են բանակը։ Երկրում մի քանի օրով անջատել էին համացանցը։ Հետաքննող հանձնաժողովի ղեկավար Մոհամեդ Չանդե Օսմանը հայտարարել է, որ զոհվածների իրական թիվը, հավանաբար, ավելի բարձր է, քանի որ որոշ ընտանիքներ հարազատներին հուղարկավորել են՝ դիակները դիահերձարաններ չփոխանցելով։

2021 թվականից իշխանության ղեկին գտնվող նախագահ Հասանը նույնպես քննադատության է ենթարկվել ընտրությունների անցկացման համար, որտեղ նա փաստացի չի բախվել լուրջ մրցակցության. նրա երկու հիմնական մրցակիցներին թույլ չեն տվել մասնակցել քվեարկությանը: Նրա գլխավոր ընդդիմախոսներից մեկը՝ Տունդու Լիսուն, այժմ կալանքի տակ է պետական դավաճանության մեղադրանքով, որը նա համարում է քաղաքականապես մոտիվացված։

Չնայած ընտրություններից հետո առաջացած քաղաքական ճգնաժամին՝ Տանզանիան պահպանում էր իշխանության համեմատաբար խաղաղ փոխանցման հեղինակությունը։ Հասանը նախագահ է դարձել 2021 թվականին՝ իր նախորդի՝ Ջոն Պոմբե Մագուֆուլիի հանկարծակի մահից հետո։