Նեթանյահուի որդին լրագրողի դեմ քրեական հետաքննություն սկսելու պահանջ է ներկայացրել

Իսրայելի վարչապետ Բենիամին Նեթանյահուի որդին՝ Յաիր Նեթանյահուն, ոստիկանության և հատուկ ծառայությունների ղեկավարներին, ինչպես նաև գլխավոր դատախազին դիմել է՝ «Հաարեց» թերթի լրագրող Ուրի Միսգավի նկատմամբ քրեական հետաքննություն սկսելու պահանջով։

Նեթանյահուն նրան մեղադրում է լրտեսության, հետապնդման և գաղտնի տեղեկատվության հրապարակման մեջ։ Նրա պնդմամբ՝ լրագրողը հրապարակել է իր բնակության ճշգրիտ հասցեն ԱՄՆ-ի Հոլանդեյլ-Բիչ քաղաքում, ինչպես նաև իր և մոր՝ Սառա Նեթանյահուի թռիչքների ժամանակացույցը։

Յաիր Նեթանյահուի պնդմամբ՝ այդ տեղեկությունները կարող էին օգտագործվել Իրանի հատուկ ծառայությունների կողմից, որոնք փորձել են իրեն սպանել, ինչից հետո ինքը շտապ տարհանվել է Իսրայել։

Լրագրող Ուրի Միսգավը հերքել է այդ պնդումները՝ նշելով, որ Յաիր Նեթանյահուի գտնվելու վայրի և նրա անվտանգության ծախսերի մասին տեղեկությունները հրապարակվել են պետական միջոցների ծախսերի վերաբերյալ իր լրագրողական հետաքննությունների շրջանակում։ Նա նաև «շտապ փախուստի» պատմությունն անվանել է կեղծ՝ պնդելով, որ Նեթանյահուն հետագայում ևս բացահայտ գտնվել է Մայամիում։