Shein-ը Հոնկոնգում IPO-ի միջոցով կկապիտալացվի շուրջ 26,5 մլրդ դոլար

Առցանց արագ նորաձևության հսկա Shein-ը նախատեսում է Հոնկոնգի ֆոնդային բորսայում բաժնետոմսերի առաջնային հրապարակային առաջարկի (IPO) արդյունքում ներգրավել շուրջ 1,7 մլրդ դոլար։ Գործարքին ծանոթ երկու աղբյուրի տվյալներով՝ ընկերության գնահատված արժեքը կկազմի մոտ 26,5 մլրդ դոլար, հայտնում է Reuters-ը։

Ակնկալվում է, որ մեկ բաժնետոմսի գինը կսահմանվի 48,56 հոնկոնգյան դոլար՝ առաջարկված 47,60-49,50 հոնկոնգյան դոլար միջակայքի գրեթե կեսին։ Ընդհանուր առմամբ ընկերությունը նախատեսում է ներգրավել մոտ 13,6 մլրդ հոնկոնգյան դոլար՝ շուրջ 1,73 մլրդ ԱՄՆ դոլար։ Բաժնետոմսերի առևտուրը Հոնկոնգի ֆոնդային բորսայում նախատեսվում է սկսել հաջորդ շաբաթ։

Ներկայիս գնահատականը զգալիորեն ցածր է Shein-ի նախկին արժեքից։ 2022 թվականին մասնավոր շուկայում ընկերությունը գնահատվում էր գրեթե 100 մլրդ դոլար, իսկ 2023 թվականի ֆինանսավորման փուլում՝ 66 մլրդ դոլար։ Ներդրողների մտահոգությունները կապված են ընկերության եկամուտների աճի դանդաղման, շահութաբերության նվազման, ծախսերի ավելացման, կարգավորող սահմանափակումների և առցանց առևտրի ոլորտում ուժեղացող մրցակցության հետ։ Shein-ը նախատեսում է IPO-ից ստացված միջոցների շուրջ 80%-ն ուղղել տեխնոլոգիաների զարգացմանը, ապրանքանիշի ամրապնդմանը և միջազգային շուկաներում ընդլայնմանը։