Կոտայքի մարզում «Chevrolet»-ը վրաերթի է ենթարկել հետիոտնին. նա մահացել է

Երեկ՝ օգոստոսի 26-ին, մահվան ելքով վրաերթ է տեղի ունեցել Կոտայքի մարզում։ Ժամը 23:40-ի սահմաններում Կոտայքի մարզի բնակիչ  21-ամյա Մանուկ Խ.-ն իր վարած «Chevrolet» մակնիշի ավտոմեքենայով Երևան-Սևան-Իջևան ավտոճանապարհի 17 կմ հատվածում վրաերթի է ենթարկել հետիոտն՝ Կոտայքի մարզի բննակիչ 25-ամյա Դավիթ Հ.-ին։

Ինչպես դեպքի վայրից հայտնում է ֆոտոլրագրող Գագիկ Շամշյանը, վարորդը փախուստի չի դիմել, ապա ժամանած «Աբովյան» բժշկական կենտրոնի շտապօգնության բժիշկների հերթապահ խումբը արձանագրել է հետիոտնի մահը։

Վարորդը ենթարկվել է սթափության փորձաքննության, եղել է սթափ։

Քննիչի հանձնարարականով ավտոմեքենան տեղափոխվել է ոստիկանության Կոտայքի բաժնի պահպանվող հատուկ տարածք։

Դեպքի վայրում հավաքվածները նշում էին, որ մահացածն օտարերկրացի է, սակայն որոշ ժամանակ անց պարեկներն ու քննիչները պարզել են, որ այդ տեղեկատվությունը հավաստի չէ։