Apple-ը փակել է iPhone-ում App Store-ից հեռացված հավելվածները կրկին տեղադրելու տարածված եղանակը

Apple-ը սահմանափակել է iPhone-ում App Store-ից հեռացված հավելվածները կողմնակի ծրագրերի միջոցով վերականգնելու և տեղադրելու հնարավորությունը։ Այս մասին հայտնում է Phone24 մասնագիտացված հարթակը։

2022 թվականից հետո պատժամիջոցների պատճառով App Store-ից հեռացվել էին ռուսական մի շարք բանկերի և այլ ծառայությունների հավելվածներ։ Դրանք iPhone-ում կրկին տեղադրելու համար օգտատերերը հաճախ օգտագործում էին iMazing և նմանատիպ ծրագրեր։ Սակայն օգոստոսի վերջին այդ մեթոդները դադարել են աշխատել։ ipatool նախագծի մշակողների տվյալներով՝ հավելված տեղադրելու փորձի ժամանակ այժմ հայտնվում է HTTP 403 սխալ։

Մասնագետների կարծիքով՝ Apple-ը սկսել է մերժել հավելվածներ ներբեռնելու համար նախկինում կիրառվող նույնականացման մեթոդները։ Որոշ գործողությունների համար App Store-ն այժմ կարող է պահանջել հատուկ թվային ստորագրություն և Private Access Token՝ մասնավոր հասանելիության նշան։ Apple-ը դեռ պաշտոնապես չի հայտարարել կողմնակի եղանակների արգելափակման մասին, իսկ մասնագետները չեն բացառում, որ հետագայում կարող են հայտնվել սահմանափակումները շրջանցելու նոր տարբերակներ։