Վիճաբանություն, հայհոյանքներ ու մահակ․ Առինջում «Rover»-ի դիմապակին ու դռներն են կոտրել

Օգոստոսի 25-ին Կոտայքի մարզի Առինջ գյուղում խուլիգանության դեպք է տեղի ունեցել։ Ժամը 22։35-ի սահմաններում ոստիկանություն ահազանգ է ստացվել, որ գյուղում վիճաբանություն է, և լսվել են նաև կրակոցի ձայներ. փոխանցում է SHAMSHYAN.com-ը։

Ոստիկանության ձեռնարկած միջոցառումներով պարզվել է, որ դեպքից առաջ 25-ամյա Արմինե Օ.-ն ընտանիքի և հարազատների հետ Առինջում վարձակալած տանը նշել է ծննդյան տարեդարձը։ Ավելի ուշ նա ամուսնու՝ 32-ամյա Արտյոմ Պ.-ի և անչափահաս երեխաների հետ «Rover 416 SL» ավտոմեքենայով մեկնել է տուն։

Ճանապարհին նրանց մեքենային մոտեցել է հարևանությամբ բնակվող 29-ամյա Կարապետ Թ.-ն, որը, ըստ տեղեկությունների, դրսից լսելով հայհոյանքների և երեխայի լացի ձայներ, նախատել է նրանց։ Դրանից հետո Արտյոմ Պ.-ն և Կարապետ Թ.-ն վիճաբանել են, որի ընթացքում փոխադարձ հայհոյանքներ են հնչել, իսկ Արտյոմ Պ.-ն ձեռքերով հարվածներ է հասցրել Կարապետ Թ.-ի մարմնի տարբեր հատվածներին։

Վիճաբանությանը միացել է նաև Կարապետ Թ.-ի 49-ամյա հայրը՝ Սասուն Թ.-ն։ Արդյունքում, ըստ նախնական տեղեկությունների, հայր ու որդի փայտե մահակով կոտրել են Արտյոմ Պ.-ի «Rover»-ի դիմապակին և վնասել մեքենայի դռները։

Դեպքի փաստով կազմված փաստաթղթերը փոխանցվել են Քննչական կոմիտեի Կոտայքի մարզային քննչական վարչության Աբովյանի քննչական բաժին։