Գերմանական արդյունաբերությունը Մերցից պահանջում է ավելի կոշտ քաղաքականություն վարել Չինաստանի նկատմամբ

Գերմանական ընկերություններն ու արդյունաբերական միությունները մեծացնում են ճնշումը կանցլեր Ֆրիդրիխ Մերցի վրա՝ պահանջելով ավելի կոշտ դիրքորոշում որդեգրել Պեկինի նկատմամբ և միջոցներ ձեռնարկել չինական ընկերությունների, իրենց գնահատմամբ, անարդար մրցակցության դեմ։ Այս մասին հայտնում է Reuters-ը։

Գերմանիայի՝ Չինաստանի հետ առևտրային դեֆիցիտը նախորդ տարի աճել է շուրջ 22 մլրդ եվրոյով՝ հասնելով 89,3 մլրդ եվրոյի։ Գերմանիա չինական ապրանքների ներմուծումն աճել է 8,8%-ով, իսկ արտահանումը Չինաստան նվազել՝ 9,7%-ով։ Գերմանական արդյունաբերության ներկայացուցիչների մտահոգությունը հատկապես մեծ է ավտոմոբիլային ոլորտում, որտեղ Volkswagen-ի նման ընկերությունները ուժեղացող մրցակցության են բախվում BYD-ի և չինական այլ արտադրողների կողմից։

Մերցը հայտարարել է, որ կառավարությանը հանձնարարել է առաջարկներ մշակել ԵՄ-ի և Չինաստանի միջև առևտրային անհավասարակշռությունը նվազեցնելու համար։ Գերմանական բիզնեսի մի շարք ներկայացուցիչներ պահանջում են արագացնել հակադեմպինգային և այլ պաշտպանական միջոցների կիրառումը։ Միևնույն ժամանակ Պեկինը հերքում է մեղադրանքները, թե պետական սուբսիդիաների կամ արժույթի փոխարժեքի միջոցով անարդար առավելություններ է ստեղծում չինական արտադրողների համար։