Գետերում և լճերում լողալը կարող է ավելի քան կրկնապատկել մաշկային խնդիրների վտանգը

Գետերում և լճերում լողալը կարող է ավելի քան երկու անգամ մեծացնել մաշկային խնդիրների առաջացման հավանականությունը, իսկ աղիքային ցուպիկով (E. coli) ջրի աղտոտվածությունը կապված է ստամոքսաղիքային խանգարումների բարձր ռիսկի հետ։ Հետազոտության արդյունքները հրապարակվել են International Journal of Hygiene and Environmental Health գիտական ամսագրում։

Գիտնականներն ուսումնասիրել են Հունգարիայի չորս քաղցրահամ լողափերում անցկացված փորձին մասնակցած 2368 մարդու տվյալները։ Մասնակիցների մի մասը 10 րոպե անցկացրել է ջրում՝ առնվազն երեք անգամ ամբողջությամբ սուզվելով, իսկ մյուսները մնացել են ափին։ Ընդ որում՝ բոլոր ջրամբարները համապատասխանել են ջրի որակի եվրոպական գործող չափանիշներին։

Լողացածների շրջանում ավելի քան երկու անգամ հաճախ են արձանագրվել ցան, քոր և մաշկային այլ խնդիրներ։ Միաժամանակ E. coli-ի քանակի յուրաքանչյուր տասնապատիկ աճի դեպքում ստամոքսաղիքային խանգարումների հավանականությունն աճել է մոտ 73%-ով։ Այնուամենայնիվ, նման խնդիրները հազվադեպ են եղել․ մաշկային կամ ստամոքսաղիքային ախտանշաններ արձանագրվել են մասնակիցների մոտ 2%-ի մոտ և հիմնականում եղել են թեթև ու կարճատև։