Դժվար օրեր միշտ էլ եղել են և լինելու են, բայց հավատքի ուժով այս դժվարությունների մեջ պետք է ավելի լավ ճանաչենք մեզ. Տեր Վազգեն

Արագածոտնի Թեմի Առաջնորդ Գերաշնորհ Տեր Մկրտիչ եպիսկոպոս Պռոշյանի օրհնությամբ թեմում ձևավորված բարի ավանդույթի համաձայն, յուրաքանչյուր շաբաթ թեմի որևէ սրբավայրում կատարվում է միասնական ժամերգություն:

Նախօրեին, հանդիսապետությամբ Արագածոտնի թեմի վարչական խորհրդի ատենապետ Հոգեշնորհ Տեր Շնորհք աբեղա Պալոյանի, Օշականի Սուրբ Մեսրոպ Մաշտոց Առաջնորդանիստ եկեղեցում էին մեկտեղվել թեմի հոգևորականները, վանականները, ուխտավոր հայորդիներ՝ միասնաբար աղոթելու Հայ Առաքելական Սուրբ Եկեղեցու անսասանության, Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսի, Արագածոտնի թեմի  առաջնորդ Գերաշնորհ Տեր Մկրտիչ եպիսկոպոս Պռոշյանի, մեր հոգևոր հայրերի, մեր հայրենիքի խաղաղության ու ապահովության, հայ ժողովրդի բարօրության, ինչպես նաև գերության մեջ գտնվող մեր հայրենակիցների համար։

Ժամերգության ընթացքում իր խոսքն հավատացյալների ուղղելով, Սուրբ Մեսրոպ Մաշտոց եկեղեցու հոգևոր հովիվ Արժանապատիվ Տեր Վազգեն քահանա Հովհաննիսյանն հորդորել է ամուր մնալ հավատքի և սիրո մեջ, երբեք չկորցնել հույսն ու վստահությունը առ Աստված և Նրա զորությամբ հաղթահարել այս օրերին մեր կյանքում ծառացած բոլոր փորձություններն ու դժվարությունները և հավելեց. «Ավետարանի լույսով և Քրստոսով ճշմարտությունը ճանաչեք, ձեր ճանապարհները թող լինեն Քրիստոսով, որպեզի բոլորս լույսով առաջնորդված հասնենք երկնքի արքայություն:

Տիրոջ սերն ու խաղաղությունը թող լինեն Հայոց աշխարհում: Դժվար օրեր միշտ էլ եղել են և լինելու են, բայց հավատքի ուժով մենք պետք է առաջ ընթանանք, անկոտրում և վստահ լինենք ու այս դժվարությունների մեջ ավելի լավ ճանաչենք մեզ և իմանանք մեր անելիքը»:

Ժամերգությանը հոգևոր դասը իր խոնարհումն է բերել Սուրբ Մեսրոպ Մաշտոցի շիրիմին՝ խնդրելով Սրբի բարեխոսությունը:

Միատեղ ու միասիրտ աղոթքն ավարտվել է Հայր Սուրբի Պահպանիչ աղոթքով։

Թեմից հայտնում են, որ միասնական հաջորդ ժամերգությունը կկատարվի սեպտեմբերի 4-ին, ժամը 18:00-ին, Ամբերդի Սուրբ Աստվածածին եկեղեցում։