ՌԴ ԱԳՆ․ Ուկրաինան խախտել է էներգետիկ ենթակառուցվածքների վրա հարվածների մորատորիումը

Ուկրաինան բազմիցս խախտել է էներգետիկ ենթակառուցվածքների վրա հարվածներից հրաժարվելու մորատորիումը, որը 2025 թվականի գարնանը առաջ էր քաշել ԱՄՆ-ը։ Այս մասին «РИА Новости»-ին հայտնել է ՌԴ ԱԳ նախարարի տեղակալ Միխայիլ Գալուզինը։

Նրա խոսքով՝ 2025 թվականի գարնանը Կիևը 136 անգամ խախտել է պայմանավորվածությունը։ Գալուզինը նշել է, որ նախաձեռնությունն ակտիվորեն առաջ էր մղում ամերիկյան կողմը, սակայն, ըստ նրա, Ուկրաինան «ոտնատակ տվեց» այն։

Խոսքը 2025 թվականի մարտի 18-ին Ռուսաստանի նախագահ Վլադիմիր Պուտինի և ԱՄՆ նախագահ Դոնալդ Թրամփի հեռախոսազրույցից հետո ձեռք բերված պայմանավորվածության մասին է։ Թրամփն առաջարկել էր հակամարտության կողմերին 30 օրով հրաժարվել էներգետիկ ենթակառուցվածքների վրա հարձակումներից։

Պուտինը աջակցել էր նախաձեռնությանը, իսկ Ուկրաինայի նախագահ Վլադիմիր Զելենսկին հայտարարել էր պայմանավորվածությանը միանալու պատրաստակամության մասին։

Միաժամանակ, Մոսկվան հետագայում բազմիցս մեղադրել է Կիևին մորատորիումը խախտելու մեջ։ Ռուսաստանի իշխանությունների պնդմամբ՝ 2025 թվականի ապրիլի 19-ի դրությամբ ուկրաինական կողմը ավելի քան 100 հարված էր հասցրել Ռուսաստանի էներգետիկ օբյեկտներին։