Չինաստանում չեն ցուցադրվում Տիբեթի ջրհեղեղի կադրերը․ զոհերի մասին տեղեկությունները սահմանափակ են

Տիբեթի և Նեպալի սահմանին տեղի ունեցած ավերիչ ջրհեղեղի հետևանքով հարյուրավոր մարդիկ զոհվել են, իսկ նույնքան մարդ դեռևս անհետ կորած է համարվում։ Ջրհեղեղի կադրերը, որոնցում երևում է, թե ինչպես են ջրի և ցեխի հոսքերը քշում շինություններն ու մարդկանց, արագ տարածվել են միջազգային սոցիալական ցանցերում, սակայն Չինաստանում դրանք գրեթե չեն ցուցադրվում։

Չինաստանի պետական լրատվամիջոցները հիմնականում հաղորդում են փրկարարական աշխատանքների մասին։ Տեղում աշխատում են հարյուրավոր փրկարարներ, իսկ նախագահ Սի Ծինփինը արտակարգ խորհրդակցություն է անցկացրել։ Միաժամանակ, երկրի խիստ վերահսկվող համացանցում գրեթե չեն հայտնվում աղետի ականատեսների տեսանյութեր, փրկվածների պատմություններ կամ անհետ կորածների հարազատների արձագանքները։

BBC-ի փոխանցմամբ՝ օտարերկրյա լրագրողների համար Տիբեթ այցելելը հնարավոր է միայն իշխանությունների թույլտվությամբ, իսկ աղետի մասին հրապարակված որոշ տեսանյութեր և տեղեկություններ հեռացվում են համացանցից։ Տիբեթի իրավապաշտպան կազմակերպությունները Չինաստանի իշխանություններին կոչ են արել հրապարակել աղետի հետևանքների և զոհերի վերաբերյալ ամբողջական ու ստուգելի տվյալներ։

Տեղեկատվության սահմանափակումը, ըստ BBC-ի, կարող է կապված լինել Պեկինի՝ հասարակական կայունությունը պահպանելու մտահոգության հետ։ Տեղական իշխանություններին հանձնարարվել է աջակցել տուժածներին, պահպանել սոցիալական կարգն ու վստահությունը։ Չինաստանի իշխանությունները, սակայն, չեն հաստատել տեղեկությունները, թե զոհերի իրական թիվը թաքցվում է։