F-16 կործանիչները Թրամփի Հյուսթոն այցի ժամանակ որսացել են հինգ ինքնաթիռ

Օգոստոսի 28-ին Օդատիեզերական պաշտպանության հյուսիսամերիկյան հրամանատարության (NORAD) F-16 կործանիչները որսացել են հինգ թեթև շարժիչավոր ինքնաթիռ, որոնք խախտել էին Հյուսթոնում թռիչքների ժամանակավոր սահմանափակումները։ Դրանք սահմանվել էին ԱՄՆ նախագահ Դոնալդ Թրամփի այցի կապակցությամբ, հաղորդել է NORAD-ի մամուլի ծառայությունը։

Բոլոր հինգ ինքնաթիռները կործանիչների ուղեկցությամբ անվտանգ դուրս են բերվել սահմանափակված գոտուց։ Այդ ընթացքում տուժածների կամ այլ միջադեպերի մասին չի հաղորդվում։

Թրամփը Հյուսթոնում էր օգոստոսի 27-ին և 28-ին։ Նախագահի այցի կապակցությամբ ԱՄՆ Քաղաքացիական ավիացիայի դաշնային վարչությունը (FAA) քաղաքի շրջանի օդային տարածքի օգտագործման ժամանակավոր սահմանափակումներ էր մտցրել։

«Ընդհանուր օդային տարածքի անվտանգության ապահովումը խնդիր է, որտեղ յուրաքանչյուր օդաչու կարևոր դեր ունի։ Տեխասում ժամանակավոր սահմանափակումների վերջին մի քանի խախտումները հստակ ցույց են տալիս, որ մենք պետք է միասին լուծենք այս խնդիրը և անհապաղ կրճատենք դրանց թիվը», — հայտարարել է NORAD-ի գործողությունների գծով տնօրեն, Կանադայի թագավորական ՌՕՈւ գեներալ-մայոր Դևիդ Մոարը։

Նա ընդգծել է, որ թռիչքների անվտանգությունը սկսվում է դեռևս մինչև օդ բարձրանալը։ Օդաչուները պետք է նախապես պլանավորեն երթուղին և ուշադիր ուսումնասիրեն թռիչքային անձնակազմի համար գործող ծանուցումները (NOTAM), որոնք պարունակում են տեղեկություն ժամանակավոր սահմանափակումների մասին։

NORAD-ում հիշեցրել են, որ թեթև շարժիչավոր ինքնաթիռի որսալուց հետո դրա օդաչուն պետք է անմիջապես անցնի 121,5 կամ 243,0 ՄՀց վթարային հաճախականության, փոխի կուրսը հակառակ ուղղությամբ և հետագա հրահանգները կատարի այդ հաճախականություններից մեկով։

Հրամանատարությունը նաև կոչ է արել ընդհանուր նշանակության ավիացիայի օդաչուներին յուրաքանչյուր թռիչքից առաջ ստուգել արդիական NOTAM-ները և խստորեն պահպանել FAA սահմանած կանոնները ժամանակավոր սահմանափակումների գոտիների համար։

ԱՄՆ մայրցամաքային մասում NORAD առաքելության օպերատիվ ղեկավարումն իրականացնում է տարածաշրջանային հրամանատարությունը, որը տեղակայված է Ֆլորիդայի Թինդալ ավիաբազայում։