Գերմանիան Ռուսաստանի դեմ ավելի կոշտ քայլեր է պատրաստում. Մերց

Գերմանիայի կանցլեր Ֆրիդրիխ Մերցը առաջիկա օրերին ծրագրում է Ռուսաստանին մեղադրել Լայպցիգի օդանավակայանում դիվերսիոն փորձ կատարելու մեջ, որտեղ հայտնաբերվել էին պայթուցիկով բեռնված անօդաչու թռչող սարքեր։ Այս մասին, հենվելով իրենց աղբյուրների վրա, հայտնում են Politico-ն և Welt am Sonntag-ը։

Սպասվում է, որ Մերցը հանդես կգա Մոսկվայի դեմ նոր պատժամիջոցների մասին հայտարարությամբ։ Լրատվամիջոցների փոխանցմամբ՝ սա լինելու է Գերմանիայի անմիջական քայլերի և ԵՄ համապատասխան պատժամիջոցների համադրություն, որոնք միաժամանակ մշակվում են Բրյուսելում։

Աղբյուրներից մեկի համաձայն՝ Լայպցիգում ԱԹՍ-ների հետ կապված դեպքից հետո այլևս բավարար չեն առանձին ռուս դիվանագետների արտաքսումը կամ Բեռլինում գործող «Ռուսական տան» գործունեության դադարեցումը։ Ըստ պարբերականի զրուցակցի՝ պահանջվում են ավելի կոշտ քայլեր, օրինակ՝ պատժամիջոցային ճնշման ավելացումը կամ Ուկրաինային սպառազինության առավել ծավալուն մատակարարումները։

Politico-ն ընդգծում է նաև, որ Բեռլինն արդեն ձեռնամուխ է եղել Մոսկվայի հնարավոր կտրուկ հակադարձմանը նախապատրաստվելու գործընթացին։