The Guardian. Իտալիայի վարչապետի բարեհաճությունը շահելու պայքարը վեճի մեջ է գցել բրիտանական երկու կուսակցությունների առաջնորդներին

Reform UK կուսակցության առաջնորդ Նայջել Ֆարաժը և Պահպանողական կուսակցության առաջնորդ Քեմի Բադենոքը, որոնք տարիներ շարունակ մրցակցել են բրիտանացի աջերի ձայների համար, հայտնվել են Իտալիայի վարչապետ Ջորջա Մելոնիի բարեհաճությունը շահելու անսովոր պայքարի մեջ, գրում է The Guardian-ը։

Հակամարտության առիթը դարձել է The Times թերթում հրապարակված հոդվածը։ Հոդվածում պնդում է արվում, որ Հռոմում կայացած հանդիպման ժամանակ Մելոնին զգուշացրել է Բադենոքին Ֆարաժի հետ համաձայնությունից, որն ուղղված է եղել աջ ուժերի միավորմանը։ Reform UK-ի և, ինչպես հաղորդվում է, հենց Մելոնիի թիմի բողոքներից հետո թերթը փոխել է նյութը և հեռացրել այդ պնդումը։

Ավելի ուշ Ֆարաժին մոտ կանգնած աղբյուրները հայտնել են The Guardian-ին, որ Մելոնին այս շաբաթ խոսել է քաղաքական գործչի հետ և ներողություն խնդրել առաջացած շփոթության համար։ Աղբյուրների վկայությամբ, Իտալիայի վարչապետը նաև շնորհավորել է Ֆարաժին Կլակտոնում վերջերս կայացած լրացուցիչ ընտրություններում տարած հաղթանակի առթիվ։

Reform UK-ի ներկայացուցիչները հայտարարել են, որ Մելոնիի թիմը կատարվածի առնչությամբ հայտնել է «խորը դժգոհություն և հիասթափություն»։ Միևնույն ժամանակ, Իտալիայի վարչապետի գրասենյակում ընդգծել են, որ Մելոնին «չի միջամտել և չի ցանկանում միջամտել բրիտանական կուսակցությունների ներքին քաղաքական դինամիկային և փոխհարաբերություններին»։

Հռոմ կատարած այցից հետո Բադենոքը Մելոնիի հետ համատեղ սելֆի է հրապարակել և նրա քաղաքական ոճը բնութագրել որպես «ուղղախոս և զգացմունքայնությունից զուրկ»։ Սակայն ծագած սկանդալը արագ փոխել է այս հրապարակման տոնայնությունը։

Պահպանողական կուսակցության նախկին ղեկավար անդամ Ռոբերտ Ջենրիկը, որն այժմ Reform UK-ից պատգամավոր է, հայտարարել է, որ Բադենոքը հայտնվել է «շատ անհարմար իրավիճակում»՝ մեղադրելով նրան Մելոնիին այնպիսի խոսքեր վերագրելու մեջ, որոնք նա չի ասել։ Ինքը՝ Ֆարաժը, նշել է, որ Իտալիայի վարչապետի ոչ մի ուղիղ մեջբերում չի տեսել, հղումն արվել է միայն հանդիպման մասին Բադենոքի պատմությանը։

Պահպանողական կուսակցությունում մերժել են կեղծ տեղեկատվություն տարածելու մեղադրանքները՝ հայտարարելով, որ Reform UK-ը փորձում է ուռճացնել այս պատմությունը, որպեսզի շեղի ուշադրությունը կուսակցությանը կատարված 5 մլն ֆունտ ստերլինգի նվիրատվության շուրջ սկանդալից։

Մելոնին, որն Իտալիայում իշխանության է եկել 2022 թվականին, վերջին տարիներին զգալիորեն ամրապնդել է իր դիրքերը միջազգային ասպարեզում։ Սեպտեմբերի 4-ին նրա կառավարությունը պետք է դառնա հանրապետության պատմության մեջ ամենաերկարակյաց մեկկուսակցական կաբինետը, իսկ ինքը՝ Մելոնին, հաջորդ տարվա ընտրություններից առաջ առաջատար է հարցումներում։

Հենց նրա քաղաքական հաջողությունն է Իտալիայի վարչապետին բրիտանացի աջերի համար դարձնում հատկապես գրավիչ գործիչ, ընդգծում է պարբերականը։

Ֆարաժը Մելոնիի հետ հարաբերություններ է պահպանում դեռ 2016 թվականից, իսկ Բադենոքը վերջին հանդիպումից հետո ակնհայտորեն ձգտում է ստանալ նրա աջակցությունը։

Միևնույն ժամանակ, Մելոնին արդեն ցույց է տվել, որ պատրաստ է հրապարակավ պաշտպանել իր անկախությունը նույնիսկ դաշնակիցների առաջ։ Վերջերս նա կտրուկ պատասխանել էր Դոնալդ Թրամփին այն բանից հետո, երբ նա ասել էր, թե Իտալիայի վարչապետը իբր «աղերսել» է իրեն G7 գագաթնաժողովում իր հետ լուսանկարվելու համար։ «Ո՛չ ես, ո՛չ Իտալիան երբեք չենք աղերսում», — հայտարարել է Մելոնին։