Հայաստանը բարձր է գնահատում Հայաստանի և Ղրղզստանի միջև ձևավորված բարեկամական հարաբերությունները․ Փաշինյան

ՀՀ վարչապետ Նիկոլ Փաշինյանը շնորհավորական ուղերձ է հղել Ղրղզստանի նախագահ Սադիր Ժապարովին՝ երկրի Անկախության օրվա առթիվ։ Այս մասին հայտնում են ՀՀ կառավարությունից։

Փաշինյանը նշել է, որ վերջին երեքուկես տասնամյակների ընթացքում Ղրղզստանն անցել է պետականության ամրապնդման և զարգացման նշանակալի ճանապարհ՝ արձանագրելով կարևոր ձեռքբերումներ սոցիալ-տնտեսական ոլորտում։

Վարչապետը ընդգծել է, որ Հայաստանը բարձր է գնահատում երկու երկրների միջև ձևավորված բարեկամական և փոխադարձ հարգանքի վրա հիմնված հարաբերությունները։

«Համոզված եմ, որ համատեղ ջանքերով կկարողանանք նոր բովանդակություն հաղորդել Հայաստանի և Ղրղզստանի միջև միջպետական փոխգործակցությանը՝ խորացնելով փոխշահավետ համագործակցությունը ինչպես երկկողմ, այնպես էլ բազմակողմ ձևաչափերում՝ ի շահ մեր ժողովուրդների»,- ասված է ուղերձում։

Փաշինյանը նաև նշել է, որ առաջիկայում Երևանում հնարավորություն կլինի շարունակելու անմիջական շփումները և քննարկելու երկկողմ օրակարգի հետագա զարգացման հարցերը։