Նիկոլ Փաշինյանը և Էմոմալի Ռահմոնը քննարկել են Հայաստանի և Տաջիկստանի միջև համագործակցության զարգացման հետագա քայլերը

Բիշքեկում ՀՀ վարչապետ Նիկոլ Փաշինյանը հանդիպել է Տաջիկստանի նախագահ Էմոմալի Ռահմոնի հետ։

Էմոմալի Ռահմոնը շնորհավորել է Փաշինյանին ՀՀ վարչապետի պաշտոնում վերանշանակվելու կապակցությամբ և ընդգծել Հայաստանի հետ տարբեր ոլորտներում կապերի զարգացման կարևորությունը։

Փաշինյանը նշել է, որ երկու երկրների միջև քաղաքական երկխոսությունը գտնվում է բարձր մակարդակի վրա՝ միաժամանակ շեշտելով առևտրատնտեսական համագործակցության զարգացման անհրաժեշտությունը։

Կողմերը կարևորել են նաև միջկառավարական հանձնաժողովի աշխատանքը և քննարկել երկկողմ հետաքրքրություն ներկայացնող հարցեր, ինչպես նաև տարածաշրջանային գործընթացներն ու զարգացումները։