ՌԴ ՊՆ-ն հայտնել է Կիևի և Օդեսայի մերձակայքում լոգիստիկ կենտրոններին հարվածների մասին

Ռուսական բանակը հարված է հասցրել Կիևի մարզում գտնվող DHL Logistics լոգիստիկ կենտրոնին, որտեղ, ռուսական կողմի պնդմամբ, պահվում էին անօդաչու թռչող սարքեր և դրանց բաղադրիչներ։ Այս մասին հայտնել է Ռուսաստանի պաշտպանության նախարարությունը։

ՌԴ ՊՆ-ի տվյալներով՝ հարված է հասցվել նաև Բորիսպոլում գտնվող «Заммлер Склад» առևտրալոգիստիկ կենտրոնին, որն, ըստ գերատեսչության, օգտագործվել է արևմտյան երկրներից Ուկրաինայի զինված ուժերին մատակարարվող ռազմական բեռների պահպանման և բաշխման համար։

Բացի այդ, ռուսական կողմը հայտնել է Օդեսայի մարզի Ներուբայսկոյե բնակավայրում լոգիստիկ կենտրոնին հարվածելու մասին, որտեղ, ըստ ՌԴ ՊՆ-ի, պահվում էին Օդեսայի նավահանգիստ ուղարկվող ռազմական բեռներ։ Գերատեսչությունը նաև հայտարարել է Յուժնի նավահանգստում Ուկրաինայի ԶՈւ-ի համար նախատեսված գույք տեղափոխող բեռնանավի խոցման մասին։