Փաշինյան․ «Հնարավոր չէ անկախություն և ինքնիշխանություն ունենալ՝ ապրելով կոնֆլիկտի պայմաններում»

Բիշքեկում Շանհայի համագործակցության կազմակերպության «ՇՀԿ+» ձևաչափի հանդիպման ժամանակ ՀՀ վարչապետ Նիկոլ Փաշինյանը հայտարարել է, որ Հայաստանի արտաքին քաղաքականության հիմնական նպատակը ինքնիշխանության և անկախության պահպանումն ու ամրապնդումն է։

Փաշինյանի խոսքով՝ Հայաստանը վարում է բազմաբևեռ, հավասարակշռված արտաքին քաղաքականություն՝ տարբեր ուժային կենտրոնների հետ հարաբերությունները զարգացնելով այնպես, որ որևէ մեկ բևեռի ազդեցությունը չվտանգի երկրի անկախությունը։

«Հնարավոր չէ անկախություն և ինքնիշխանություն ունենալ՝ ապրելով կոնֆլիկտի պայմաններում»,- հայտարարել է Փաշինյանը՝ շեշտելով, որ բազմաբևեռությունը պետք է առաջին հերթին արտահայտվի այն տարածաշրջանում, որտեղ երկիրը գտնվում է։

Նա նշել է, որ Հայաստանը Թուրքիայի և Ադրբեջանի հետ միջպետական հարաբերություններ կառուցելու ճանապարհով է գնում, իսկ Ադրբեջանի հետ խաղաղության հաստատումից հետո աշխատում է նաև հաղորդակցությունների բացման ուղղությամբ։

Փաշինյանը նաև հայտարարել է, որ առաջիկա ամիսներին գետնի վրա կմեկնարկեն TRIPP նախագծի իրականացման աշխատանքները, որը, ըստ նրա, նոր տրանսպորտային հնարավորություններ կստեղծի տարածաշրջանի համար։

Վարչապետը նշել է նաև, որ նույն օրը նախատեսում է հանդիպել Ռուսաստանի նախագահ Վլադիմիր Պուտինի հետ՝ քննարկելու հայ-ռուսական հարաբերությունների հետագա զարգացման ռազմավարությունը։