Արաղչի․ ԱՄՆ-ը պետք է վերադառնա ստանձնած պարտավորություններին՝ պատերազմը ավարտելու համար

Իրանի արտաքին գործերի նախարար Աբբաս Արաղչին հայտարարել է, որ ստեղծված իրավիճակից դուրս գալու հստակ ճանապարհը Միացյալ Նահանգների կողմից Իսլամաբադի փոխըմբռնման հուշագրով ստանձնած պարտավորություններին վերադառնալն է։ Այս մասին հայտնում է «Մեհր» գործակալությունը։

Արաղչին այդ մասին խոսել է Ղրղզստանում անցկացվող Շանհայի համագործակցության կազմակերպության գագաթնաժողովի շրջանակում։ Նրա խոսքով՝ գագաթնաժողովի ընթացքում իր ունեցած հանդիպումներն ու բանակցությունները հիմնականում աշխատանքային բնույթ են կրել։ Քննարկումների առանցքում եղել են տնտեսական համագործակցությունը և փոխգործակցության այլ ուղղություններ։

Իրանի արտգործնախարարը նշել է, որ հանդիպումների ընթացքում անդրադարձ է եղել նաև ԱՄՆ-ի կողմից իրականացված ագրեսիվ գործողություններին և դրանց հետևանքներին։

«Մենք ընդգծեցինք, որ իրանական ժողովուրդը շարունակելու է պաշտպանել իր իրավունքները։ Այս դիրքորոշումը հնչել է բոլոր հանդիպումների ընթացքում»,- ասել է Արաղչին։

Նրա խոսքով՝ քննարկումների կարևոր թեմաներից մեկը եղել է նաև Իսլամաբադի փոխըմբռնման հուշագիրը, որը ստորագրվել է երկու երկրների նախագահների կողմից և, Իրանի գնահատմամբ, խախտվել է ԱՄՆ-ի կողմից։

Արաղչին ընդգծել է, որ Վաշինգտոնը պետք է վերադառնա հուշագրով ստանձնած պարտավորությունների կատարմանը և հետևի դրա դրույթներին։ Նրա համոզմամբ՝ դա կարող է հիմք ստեղծել ստեղծված իրավիճակից դուրս գալու և բանակցային գործընթացը ճիշտ ուղու վրա վերադարձնելու համար։

«Դրանից հետո մենք կարող ենք դուրս գալ այս իրավիճակից, քանի որ բոլոր երկրները մտահոգված են, որ պատերազմը հնարավորինս շուտ ավարտվի»,- ասել է Իրանի արտգործնախարարը։

Նա հավելել է, որ ԱՄՆ-ը պետք է վերադառնա այն համաձայնագրին, որը ստորագրել է իր նախագահը։ Արաղչիի խոսքով՝ այդ դեպքում հնարավոր կլինի իրավիճակը կարգավորել և գործընթացը վերադարձնել կառուցողական հուն։