Մադուրոն կփորձի հասնել ԱՄՆ-ում իր դեմ քրեական գործի կարճմանը

Վենեսուելայի իշխանությունից հեռացված նախագահ Նիկոլաս Մադուրոն սեպտեմբերի 2-ին պատրաստվում է դիմել ԱՄՆ դատարան՝ պահանջելով կարճել իր դեմ հարուցված քրեական գործը։ Նրա պաշտպանությունը նախատեսում է հիմնվել երկու հիմնական փաստարկի վրա՝ պետության ղեկավարի անձեռնմխելիության և ԱՄՆ զինվորականների կողմից նրա ձերբակալման օրինականության հարցի։ Այս մասին հայտնում է Reuters-ը։

Մադուրոն, որը մեղադրվում է թմրամիջոցների ապօրինի շրջանառության և մի շարք այլ հանցագործությունների մեջ, իրեն մեղավոր չի ճանաչել։ Նրա փաստաբան Բարի Փոլաքը պնդում է, որ Մադուրոն, որպես ինքնիշխան պետության ղեկավար, պետք է անձեռնմխելիություն ունենա այլ երկրի դատարանում քրեական հետապնդումից։ Սակայն ԱՄՆ-ը 2019 թվականից Մադուրոյին չի ճանաչում որպես Վենեսուելայի օրինական նախագահ, ինչը, Reuters-ի հարցմանը մասնակցած իրավագետների գնահատմամբ, կարող է էապես թուլացնել պաշտպանության դիրքերը։

Մադուրոյի պաշտպանությունը կարող է նաև պնդել, որ հունվարի 3-ին Վենեսուելայում ԱՄՆ ռազմական գործողության ընթացքում նրա ձերբակալումը հակասել է միջազգային իրավունքին և երկու երկրների միջև արտահանձնման պայմանագրին։ Սակայն Reuters-ը նշում է, որ ԱՄՆ դատական նախադեպերը հիմնականում թույլ են տալիս շարունակել քրեական հետապնդումը նույնիսկ այն դեպքերում, երբ մեղադրյալի՝ ԱՄՆ տեղափոխման օրինականությունը վիճարկվում է։

Եթե դատարանը չբավարարի գործը կարճելու պահանջը, Մադուրոյի դատավարության մեկնարկը նախատեսված է 2027 թվականի հունիսի 1-ին։