Ռուս գիտնականներին հաջողվել է ութ անգամ բարձրացնել «գազային մարտկոցների» հզորությունը

Ուրալի դաշնային համալսարանի գիտնականները գործընկերների հետ համատեղ մշակել են մեթոդ, որը թույլ է տվել ութ անգամ բարձրացնել պինդ օքսիդային վառելիքային տարրերի հզորությունը։ Հետազոտության արդյունքները հրապարակվել են Journal of Power Sources գիտական ամսագրում, հայտնում է ՌԻԱ Նովոստին։

Այս համակարգերը գազային վառելիքի և օդի թթվածնի միջև քիմիական ռեակցիայի էներգիան անմիջապես վերածում են էլեկտրաէներգիայի։ Ի տարբերություն սովորական մարտկոցների՝ դրանք չեն սպառում ներսում կուտակված էներգիայի պաշարը, այլ աշխատում են այնքան ժամանակ, քանի դեռ արտաքին աղբյուրից վառելիք է մատակարարվում։

Գիտնականները փոփոխել են վառելիքային էլեկտրոդը՝ անոդը։ Դրա վրա ավելացվել է հաղորդիչ արծաթե շերտ, ինչպես նաև նիկելի և ցերիումի օքսիդի մանրադիտակային մասնիկներ։ Արդյունքում էլեկտրոդի էլեկտրաքիմիական ակտիվությունը մեծացել է 20 անգամ, իսկ ամբողջ վառելիքային տարրի հզորությունը՝ ութ անգամ՝ 800°C ջերմաստիճանում հասնելով 450 միլիվատտի մեկ քառակուսի սանտիմետրի համար։

Մշակողների խոսքով՝ փոփոխված համակարգը արդյունավետությունը պահպանել է 500 ժամ տևած փորձարկումների ընթացքում։ Հաջորդ փուլում նախատեսվում է տեխնոլոգիան հարմարեցնել ավելի մեծ չափերի վառելիքային տարրերի համար, որոնք կարող են կիրառվել հարյուրավոր կիլովատտ հզորությամբ էներգետիկ համակարգերում։