Պուտինը Ալիևին անվանել է «ժամանակակից և ինտելիգենտ մարդ»

ՌԴ նախագահ Վլադիմիր Պուտինը Ադրբեջանի նախագահ Իլհամ Ալիևին անվանել է ժամանակակից և ինտելիգենտ մարդ։ Այս մասին նա հայտարարել է Բիշքեկում Շանհայի համագործակցության կազմակերպության գագաթնաժողովի ավարտից հետո կայացած մամուլի ասուլիսում, փոխանցում է ՏԱՍՍ-ը։

Պուտինի խոսքով՝ մինչև 2023 թվականը արևմտյան երկրների ներկայացուցիչներն իր հետ քննարկում էին Լեռնային Ղարաբաղի հայ բնակչության իրավունքների ապահովման հնարավորությունը։ «Ես ասում էի՝ ոչինչ չեք ապահովի, մարդիկ պարզապես կհեռանան, և վերջ։ Թեև նախագահ Ալիևը նրանց ոչ մի վատ բան չէր անի․ նա ժամանակակից, ինտելիգենտ մարդ է»,- հայտարարել է ՌԴ նախագահը։

Պուտինը նաև նշել է, որ այդ քննարկումների ժամանակ արևմտյան երկրների ներկայացուցիչները Ղարաբաղը համարում էին Ադրբեջանի մաս։ Նրա խոսքով՝ հետագա իրադարձությունները զարգացան այնպես, ինչպես ինքն էր կանխատեսել։

2023 թվականի սեպտեմբերին Ադրբեջանի ռազմական գործողությունից հետո Լեռնային Ղարաբաղից սկսվեց հայ բնակչության զանգվածային տեղահանումը։ Երկու շաբաթվա ընթացքում տարածաշրջանը լքեց ավելի քան 100 հազար մարդ՝ գրեթե ամբողջ էթնիկ հայ բնակչությունը։