Թուրքիայի տնտեսական աճը նվազել է մինչև 2,3 տոկոս

2026 թվականի երկրորդ եռամսյակում Թուրքիայի ՀՆԱ-ն տարեկան կտրվածքով աճել է 2,3 տոկոսով։ Սա 2020 թվականից՝ COVID-19-ի համավարակի շրջանից ի վեր, երկրի տնտեսական աճի ամենացածր ցուցանիշն է, գրում է «Коммерсантъ»-ը՝ հղում անելով Թուրքիայի վիճակագրական ծառայության (TUIK) տվյալներին։

Տնտեսական աճի դանդաղումը, մասնավորապես, պայմանավորված է արդյունաբերական արտադրության կրճատմամբ․ հունիսին այն նվազել է 1,4 տոկոսով։ Միևնույն ժամանակ տնտեսությանը շարունակում է աջակցել սպառողական ակտիվությունը․ ապրիլ-հունիսին տնային տնտեսությունների ծախսերն աճել են 3,5 տոկոսով։

Հուլիսին տարեկան գնաճը նվազել է մինչև 31,8 տոկոս՝ հունիսի 32,1 տոկոսի համեմատ։ Թուրքիայի Կենտրոնական բանկը հունվարից հիմնական տոկոսադրույքը պահում է 37 տոկոսի մակարդակում։

Բացասական միտումներ են գրանցվել նաև արտաքին առևտրում և զբոսաշրջության ոլորտում։ Հուլիսին Թուրքիայի առևտրային դեֆիցիտն աճել է 13,6 տոկոսով՝ հասնելով 7,3 մլրդ դոլարի, իսկ երկրորդ եռամսյակում զբոսաշրջությունից ստացված եկամուտները տարեկան կտրվածքով նվազել են 2,6 տոկոսով՝ մինչև 15,9 մլրդ դոլար։