Ուսումնասիրությունների կենտրոնում Արարատ լեռն է

Գերմանա-թուրքական գիտական խումբը ուսումնասիրում է Արարատի սառցադաշտերը՝ փորձելով վերականգնել տարածաշրջանի հազարամյակների կլիմայական և բնապահպանական պատմությունը։ Այս մասին գրում է հեղինակավոր National Geographic-ը։

Հետազոտողները 2026 թվականի հուլիսին Արարատի գագաթային հատվածում՝ ավելի քան 5000 մետր բարձրության վրա, սառույցի նմուշներ են վերցրել։ Արշավախմբի ընթացքում կիրառվել են սառույցի ուսումնասիրության համար հարմարեցված գեոռադար և սեյսմիկ չափումներ, որոնց միջոցով հնարավոր է պարզել սառցաշերտերի հաստությունն ու կառուցվածքը։

Գիտնականները Արարատի սառույցը դիտարկում են որպես յուրօրինակ բնական արխիվ։ Սառցաշերտերում պահպանված օդային պղպջակները կարող են տեղեկություններ հաղորդել անցյալի մթնոլորտի կազմի, հրաբխային ժայթքումների, փոշու տարածման և կլիմայական փոփոխությունների մասին։

Հետազոտողների առանձնահատուկ հետաքրքրության կենտրոնում են այն ժամանակաշրջանները, որոնց վերաբերյալ Մերձավոր Արևելքի և Կովկասի համար տվյալները սահմանափակ են։ Արարատի սառցադաշտերի ուսումնասիրությունը կարող է նոր տեղեկություններ տալ նաև Հռոմեական կլիմայական օպտիմումի և VI-VII դարերի կլիմայական փոփոխությունների վերաբերյալ։

Գիտնականների խոսքով՝ կլիմայի փոփոխության հետևանքով Արարատի սառցածածկույթը արագորեն նվազում է, և սառույցում պահպանված պատմական տեղեկությունները կարող են անդառնալիորեն կորչել։ Հաջորդ արշավախմբի ընթացքում նախատեսվում է փորձել Արարատից ստանալ երկար և հնագույն շարունակական սառցային նմուշ։

Հետազոտողները նաև հույս ունեն սառույցում հայտնաբերել մարդու վաղ գործունեության անուղղակի հետքեր, այդ թվում՝ մետաղամշակման կամ վաղ երկրագործության հետ կապված մասնիկներ։

Միևնույն ժամանակ, գիտնականները շեշտում են, որ չնայած Արարատի՝ Նոյի պատմության հետ ունեցած լեգենդար կապին, արշավախմբի նպատակը Նոյի տապանի որոնումը չէ։ Հետազոտողները փորձում են ուսումնասիրել լեռան սառույցն ու ապարները և դրանց միջոցով վերականգնել տարածաշրջանի անցյալի պատմությունը։